PR di Elmar NV, Audrey Croes:
*Mensahe di Elmar ta enfoca riba siguridad
ORANJESTAD (AAN): Ultimamente diferente accidente a tuma luga na cu ta envolve palo di luz. Elmar NV semper ta enfoca riba siguridad den trafico y tin atencion pa esaki.
Audrey Croes, PR di Elmar NV, den un entrevista cu DIARIO a remarca cu un accidente riba palo di luz tin daño significante tanto riba e manehado di e auto cu a causa e accidente como tambe riba e red di Elmar. Segun e, dependiendo e tipo di palo di coriente cu a wordo afecta, sea ta un palo di luz, un laagspanningsmast, of un hoogspanningsmast, ta depende e efecto cu esaki tin riba e persona.
Tambe, un accidente asina tin efecto riba comunidad, mas tanto pa e personanan den e area mas cerca di e accidente. Door cu e red di Elmar ta hopi flexibel, por isola e problema rapidamente pa reconecta tur area. Pero e area mas cerca, ta e area cu ta keda mas afecta pa mas ora prome cu reparacion keda cla.
Señora Croes a indica cu e mensahe di siguridad di Elmar pa pueblo di Aruba ta keda clave. Na momento cu ciudadanonan wak un accidente di auto cu a afecta un palo di lz, pa keda leu di e wayanan di coriente, na un distancia di 15 meter, te ora cu tin confirmacion di Elmar cu a desconecta coriente. Esaki ta conta tambe pa first responders cu ta yega pa atende y tambe pa e manehado di e auto cu a dal den e palo di coriente. Y si e manehado of esnan den auto mester sali di e auto pa motibo cu nan ta wak e peliger, mester tuma precaucion y baha y cana poco poco, cu pia banda di otro y mannan pega na curpa y no mishi e parti metal di e auto.
Riba remarkenan cu Elmar ta tarda hopi pa repara y conecta, señora Croes a remarca cu tur esaki mester cana su proceso. Prome, na e sitio di e accidente, ta yama polis, polis ta contacta Elmar cu ta cana e proceso pa yega na e sitio. Segun e, pa desconecta coriente ta bay hopi lihe pero e proceso pa repara ta tuma su tempo. Prome cu cuminsa repara, mester haci tur e daño limpi, cambia tur e ekipo, pa despues reconecta.
“Esaki ta e proceso di siguridad cu ta cana paso pa paso pa asina e trahadonan di Elmar y tur esnan rond y esun afecta ta sigur. E yamada di Elmar ta keda pa tur ciudadano maneha sigur den trafico pa evita peliger pa bo mes pero sigur pa tur esnan rond di bo”, el a expresa.
