Sue-Ann Ras, lider di Proyecto Codigo di Proteccion:
ORANJESTAD (AAN)—Siguiendo cu e tema tocante presencia di mucha di 0-4 aña den eventonan di carnaval y posibel consecuencianan, Sue-Ann Ras, Lider di e Proyecto Codigo di Proteccion, a comenta den entrevista cu DIARIO cu tin hopi fundacion cu ta haci e tipo di concientizacion aki, pa mayornan.
Sinembargo, mayornan ta keda e promenan yama como responsabel. El a señala cu dos siman pasa mes tabata tin casonan di abuso sexual di mucha loke a hala atencion di tur hende, tur hende ta rabia, ta critica, tur kier miho cosnan pero nan ta lubida cu e abuso di mas grandi cu ta sosode, ta negligencia di mayornan mes.
Sue-Ann a bisa cu tur tipo di abuso no ta bon, anto specialmente negligencianan cu por tin efectonan secundario pa henter bida di e mucha. “Corda bon, ora bo neglisha un mucha, cu no ta dune e amor, e atencion, e cuido y e proteccion necesario, bo mes ta bezig ta fomentando algo cu no ta corecto den e mucha, anto dia di mañan boso kier puntra di con e mucha t’asina. Berdad abuso sexual ta algo devastador pa e mucha, pero tambe negligencia di mucha ta un abuso cu nos no por tolera, y esey ta cuminza den cas”, Sue-Ann Ras a remarca.
Mayornan por wordo bisa con pa lanta nan yiu, pero si ora nan ta lantando nan yiu no tin conocemento, of nan o ta sigur di loke nan ta haciendo, tin hopi fundacion cu nan por acerca haya tips.
“Dus, haci caso di e tips ey; haci caso di e tipo di educacion ey cu bo por haya gratis, pa bo por educa bo yiunan, pasobra na momento cu e bay fout, si bo ta core bin na tur e departamentonan y tur instancia pa busca ayudo. E ora ey si bo kier pa tur e instancianan bay yuda un mucha cu bo a lant’e completamente robes, anto nos tin cu bay drech’e bek. Tin biaha e ta logra, tin biaha e ta dificil pa logra, Sue-Ann Ras a expresa.
El a conclui bisando cu e ta kere cu mayornan mester ta mas conciente cu derecho di mucha no ta cuminza solamente cu gobierno, cu instancianan of fundacionnan, pero e ta cuminza cu e mayor pasobra esey ta e prome cu e Tratado ta bisa tambe.
