ORANJETAD (AAN): Ministro di Deporte, Gerlien Croes, tabata na Aeropuerto Reina Beatrix pa
asina participa den e famoso 2025 Little League Baseball World Series na Williamsport, Pennsylvania.
Williamsport ta un ciudad y ta den Lycoming County, y tin un poblacion di como 30 mil habitante. E ta e centro cultural, financiero, y comercial di North Central Pennsylvania, y ta situa 285 km leu for di Philadelphia, y 267 km leu di Pittsburgh. Williamsport ta conoci pa su deporte, y escena di arte.
Ta di menciona cu Williamsport ta e lugar unda Little League Baseball a nace. Pesey e ta tambe e sede mundial di Little League Baseball y tur aña ta organiza e Little League World Series.
Diahuebs mainta, ta hopi famia y fanatico tabata presente pa asina despedi di e muchanan cu a bay pa e titulo maximo, representando Region di Caribe. E team di Aruba ta bay ta representa e ‘cara’ di Caribe.
Team di Aruba ta wordo dirigi pa manager Max Arendsz, kende tin hopi expectativa grandi pa logra bin cu e titulo maximo bek pa e isla.
Ministro Gerlien Croes tambe a dirigi su mes na e muchanan, y a duna nan apoyo y palabra di tur exito na nan na Williamsport.
E prome wega di Aruba lo bay ta Diabierna 14 di Augustus 2025 pa 5:00 pm. Aki e seleccion di Aruba (Caribe) lo enfrenta e ganador di Wega 3, esta sea team di Panama of e team di Australia. E wega aki lo pasa sea via ESPN of via ABC-TV Network.
