Drs. Melva Croes, presidente di Fundacion Alzheimer:
ORANJESTAD (AAN)— Melva Croes-Yanes, Presidente di Fundacion Alzheimer Aruba, a splica den un entrevista cu DIARIO, cu Diasabra 15 di Juni awo, en ocasion di e Dia Internacional di Concientizacion riba Abuso di Adulto Mayor, FAA ta bay organiza un charla tocante abuso di adulto mayor. E lo tuma lugar na ATIA Building, Dakota di 1 or traimerdia te 5 or atardi.
Señora Croes a expresa cu aworaki tur hende sa kico ta abuso di adulto mayor, y logicamente e fundacion ta bay riba e diferente sortonan di abuso cu tin, y nan ta masha hopi mes.
Melva Croes a señala cu e parti tecnologico ta uno cu nan lo bay riba un anochi informativo. Diasabra 15 di Juni awo, nan ta bay mas riba e parti medico, y e aspecto general di abuso mes cu ta door di mr. Lili Marval.
“Di mi mes ta e parti cognitive, kico stress ta haci ora bo pone un adulto mayor bao di stress, kico ta pasa den su cerebro. Kico ta e cos cu abuso mes ta haci cu bo cerebro? E ta cambia bo cerebro”, Melva Croes a indica.
El a agrega cu un persona cu tin diabetes, si bo pon’e bao di un stress pisa kico e ta haya? “E ta haya cu su cortisol ta bay halto y nos a haya caso unda si e persona a para un tiki asina ey e lo a fayece”, Melva Croes a bisa.
“ E charla aki ta dus, un seminario chikito e ta. Eigenlijk nos no kier a cobra, pero door cu nos mester paga e gastonan di e lugar, nos ta pidi un contribucion chikito.
E sala tin capacidad pa 80 persona, y esnan interesa por cuminza inscribi cerca nos of nan por manda nos un email na Cette adresse e-mail est protégée contre les robots spammeurs. Vous devez activer le JavaScript pour la visualiser., door cu esaki ta un proyecto enberdad di Fundacion Alzheimer Aruba”, Melva Croes a menciona.
Fundacion Alzheimer ta interesa pa e charla aki wordo atendi pa tur persona sin distincion di edad, pues no solamente adulto mayor.
“Pasobra e discriminacion entre edadnan, nos ta yam'e ‘edadismo’ for di awo caba mester cuminza integra e dos gruponan aki, cu eigenlijk durante e transcurso di añanan nan a sali fo'i otro. Nos ta papiando akinan di e hobennan cu e hendenan grandi of adultonan mayor; cu bo ta bay haya bo cu tin un ‘generation gap’ manera nan ta yame, entre e adultonan mayor y esnan hoben. Pasobra si bo tin e hobennan tambe cu ta traha hunto cu adulto mayor cu tin experiencia, nan por siña hopi di otro”, Melva Croes a comenta.
Croes a señala cu e hoben por yuda e grandinan cu digitalizacion y e grandi por siña e hoben cu nan conocimentonan y experiencia den otro aspectonan. Pues, mester elimina e gap ey cu tin entre hoben y adulto mayor.
