ORANJESTAD (AAN): Segun Partido MEP, 'accionnan ta papia mas cla cu bo palabranan' (Actions speak louder than words) di berdad ta un dicho totalmente corecto ora ta referi na e actitud di cierto politico hoben den Parlamento.
Siman pasa, Fraccion di MEP, sosteni door di Fraccion di RAIZ, a entrega un mocion di integridad pa ancra den ley cu un politico cu ta acusa/sospecha di corupcion of un politico corupto, no por bira un parlamentario manera aworaki ta e caso di Parlamentario Benny Sevinger di AVP.
Prome cu eleccion 2021, señor Sevinger tabata den KIA y ta wordo sospecha di 5 acto criminal. Y asina mes Lider di Partido AVP a pone señor Sevinger riba e lista berde y a encurasha tur hende vota pa señor Sevinger. Pero, no ta tur candidato riba e lista berde tabata di acuerdo cu e decision aki di Mike Eman. Actual Parlamentario hoben, y algun otro colega hoben di partido, a vocifera y te hasta sapatia pa mustra nan desacuerdo. Pasobra e parlamentario y su coleganan hoben aki no tabata kier cu un persona acusa di 5 acto criminal y den KIA, ta riba lista hunto cu nan y mucho menos drenta Parlamento cu ne.
Durante tratamento di Presupuesto 2022, unda cu un mocion a wordo entrega pa sigura cu ningun persona corupto of sospecha di ta corupto por bira parlamentario, señor Sevinger ainda ta un sospechoso di 5 acto criminal. Sinembargo e biaha aki si Parlamentario Gerlien Croes no a sapatia y mustra cu e no ta di acuerdo cu Mike Eman. Mike Eman a instrui su Fraccion pa vota contra e mocion di integridad pa protehe un biaha mas nan colega sospecha di ta corupto.
-Gerlien Croes ta vota contra
Y un biaha mas, Gerlien Croes a mustra cu ‘actions speak louder than words’ y e tambe a vota contra di un mocion cu e mes ta kere aden. Un biaha mas Gerlien ta bay contra di su palabranan y mustra cu accion cu e no ta para pa integridad. Ki bal papia di integridad y contra corupcion, y bo ta mustra cu accion cu bo no ta para pa integridad y contra corupcion. Y cu esaki, Gerlien Croes, politico hoben, un biaha mas ta perde credibilidad.
Gerlien Croes, un hoben politico cu ta yena su boca voorbij cu palabranan contra corupcion y pro integridad, a haya e oportunidad den Parlamento, den un reunion na unda publico por tawata presente y a pasa via television y medianan social, a mustra cu su accion ta papia mas cla cu su palabranan. Y asina tambe, pueblo di Aruba sa sigur awor, cu Gerlien Croes tambe ta sostene corupcion. E tambe ta brasa corupcion por lo tanto e ta contra integridad. Gerlien a risca su imagen supuestamente integro, pa sigui un biaha mas tras di su lider. Y awe, Gerlien Croes tambe ta contento cu e mocion aki a wordo aproba aunke sin su voto. E ta contento cu pronto e ley aki lo wordo ancra pa asina un di dos Benny por bira parlamentario mas.
Partido MEP ta felicita Fraccion di MEP y Fraccion di RAIZ den Parlamento cu e ley aki cu lo asegura cu politiconan cu ta sospechoso di actonan penal, no por bira parlamentario mas manera awo ta e caso di Parlamentario Benny Sevinger y nunca mas Aruba su cara lo wordo poni na berguensa ni local ni internacional pa motibo di politiconan manera Gerlien Croes y henter oposicion cu ta brasa corupcion.
