Fraccion di MEP a tuma nota
ORANJESTAD (AAN): Durante reunion den Parlamento siman pasa a trata presupuesto supletorio pa 2025. Den e cuadro aki Fraccion di MEP a trece e retonan dilanti cu tin den enseñansa na comienso di e aña escolar.
Fraccion di MEP a reuni cu varios persona di e veld di enseñansa, y un conclusion cu a bin dilanti ta cu e veld no ta mucho contento cu e minister. Fraccion di MEP a pidi nan pa duna e minister tempo, pa e compronde kico ta su trabao y con pa haci su trabao.
“P’esey mi a bisa Prome Minister Eman, cu si ta asina, pa e prepara, pasobra e ta pone mi corda e tempo di mi prome gabinete, y cu e ta bay ta basta druk pasobra si tin problema den e veld, y nan no ta contento cu nan minister, ta cerca e prome minister nan ta bin.
Den mi gobiernonan e minister di enseñansa semper tabata tey den vakantie grandi, en todo caso (por lo menos) e dos simannan prome cu vakantie caba, pa atende cu e candelanan. Bureau di ex minister Endy Croes tabata tin un desk special pa atende cu e retonan, pa asina haci lo maximo pa scolnan cuminsa sin mucho problema.
E aña aki nos a mira cu e minister di enseñansa a biaha basta frecuente durante e vakantie, y p’esey por ehempel no a ni firma contractnan cu a vence 3 siman pasa. Cu como consecuencia cu docentenan a cuminsa aña escolar sin por cobra nan salaris completo; nan a compronde cu door di e eror di e minister aki, talbes nan por cobra un parti di nan salario. Nan pregunta ta: con nan por paga nan debenan?
Ohala cu den e tempo nos dilanti, nos mira un cambio, pa trece trankilidad den e veld di enseñansa, cu ta un veld hopi importante pa nos Fraccion y pa henter Aruba”, lider di fraccion Evelyn Wever-Croes a duna di conoce.
