Dangui Oduber di MEP kier haya sa:
ORANJESTAD (AAN): Parlamentario Dangui Oduber ta cuestiona seriamente e maneho nobo di gobierno AVP-Futuro pa e sector di vacation rentals. E medidanan di gobierno ta encera un stop inmediato riba desaroyo di vacation rentals nobo, mientras cu e operadornan existente lo haya e oportunidad pa registra y legalisa nan actividadnan.
"Con por ta cu inversionistanan grandi cu ya tin 10 of 20 propiedad por sigui opera sin problema, mientras cu un local cu kier cumpra un tereno y construi dos of tres apartamento ta haya porta cera?", Oduber ta cuestiona.
Proteccion pa esnan grandi vs Oportunidad pa e pueblo: Segun Oduber, Aruba mester di regulacion, pero esaki no por bira un instrumento pa proteha posicion di e inversionistanan grandi y limita oportunidad di nos propio hendenan.
P’esey, e parlamentario ta exigi di Minister Geoffrey Wever pa presenta: (*) E base legal y e estudio economico cu ta hustifica e stop aki. (*) Claridad tocante e futuro di e localnan cu ya a haci inversion den tereno, plan di construccion of cu tin compromisonan bancario caba.
“Gobierno no por uza e problematica di vivienda como un hustificacion pa limita inversion local, sin demostra cu e medida aki realmente lo crea mas vivienda pagabel pa nos hendenan,” Oduber ta enfatisa. Ademas, e parlamentario ta resalta cu e sector di vacation rentals ta genera actividad economico directo pa hopi famia Arubiano, incluyendo trabaonan den construccion, limpiesa, mantencion y otro servicionan.
"Nos kier un economia di oportunidad, no un economia di privilegio. Minister Wever mester garantisa cu e maneho nobo aki no ta crea un monopolio pa esnan grandi mientras nos localnan ta keda afo," e parlamentario a agrega.
Un intencion diferente pa e sector: E parlamentario a conclui marcando e diferencia entre e vision actual y e trabao cu a wordo haci den pasado. Oduber a recorda cu den e gobernacion anterior a laga un Proyecto di Ley cla pa regula e sector di vacation rentals y pa institui un autoridad nobo: e Aruba Quality Hospitality Authority. E meta di e entidad aki tabata pa controla e registracion, calidad y higiena di e propiedadnan.
Segun Oduber, e intencion nunca tabata pa pone un stop pa nos propio hendenan inverti, sino pa eleva e standard di e sector. Sinembargo, e maneho di e Gobierno actual ta haci net lo contrario: cu ta kita e derecho di e Arubiano pa progresa y lo perhudica directamente tur e localnan cu tin e deseo y e ambicion di inverti den nan propio pais.
