Otmar Oduber, lider Plataforma Nos Pais:
ORANJESTAD (AAN) — Lider di Plataforma Nos Pais, Otmar Oduber, a yama un conferencia di prensa, cual el a habri cu palabranan fuerte pa Minister Ursell Arends, ken e ta considera cu gañado y incapaz di hiba un maneho adecua, ni traha un hinder vergunning adecua, y mester a pidi gobierno pa bolbe traha uno manera mester ta. Otmar Oduber a vocifera cu “Ursell Arends mester entrega su retiro awe!”
Oduber a señala cu atrobe Huez a bisa Arends cu e tin cu bay bek na uza incinerator pa Parkietenbos y e no por bay na kimamento di sushi na aire liber manera antes. Segun Otmar Oduber esaki ta loke Arends kier a haci, kima carcas, sushi medico, y slosh unda cu e kier. El a subraya cu Huez a bisa minister Arends cu su maneho ta malo y no por bay den un “open burner” atrobe pero si e tin cu bay bek na Incinerator.
Otmar Oduber a bisa cu Ursell Arends a nenga pero e mes a wak e carta unda e ta firma pa DOW bay kima “pupu” y slosh riba Parkietenbos atrobe.
“Ursell Arends ta un gañado cu no solamente no tin maneho. Pero luna pasa el a bisa DOW dal bay, ban kima slosh, pupu, na Parkietenbos apesar di tur loke bisiñanan ta bisando”, Otmar Oduber a señala.
Apesar cu e no a traha un hinder vergunning corecto y cu Arends a faya, Huez a dune tres luna pa cende un incinerator y haci e trabao, segun Otmar Oduber a trece dilanti.
“Ursell Arends tin cu entrega su retiro awe, no mañan! Mi ta pone responsable pa tur e desaster den e cartera aki na Aruba, cu ta ocasionando problema pa nos pais” Oduber a remarca.
