ORANJESTAD (AAN) Pa finaliza su relato relaciona cu e capitulo nobo cu Partido Raiz ta iniciando den su ruta politico na Aruba, RAIZ ta expresa:
“Y ainda falta. Señor Arends ta cla pa sigui fortifica RAIZ y guia e partido den e proximo era di crecemento y logronan pa cosecha un pais unda cu ta reina abundancia y prosperidad real den su hendenan. E ta comprometi na hiba un gobernacion cu di berdad ta transparente y traha riba mas proyecto cu ta beneficia nos comunidad a termino largo”.
“Mi ta comprometi cu Aruba” Señor Ursell Arends, Lider, Partido RAIZ, ta comenta. “Ora un comunidad ta bini hunto y cera cabes pa logra un mihor bienestar pa su pais, e retonan ta bira posibilidadnan nobo y speranza ta nace bek.”
Arends ta sigui comenta: “RAIZ ta keda para pa su principionan y cu nos direccion strategico nobo nos no ta solamente fortalece nos compromiso na Aruba, pero tambe tuma un paso fuerte dilanti pa traha pa un futuro unda cu politica ta sirbi su hendenan cu integridad y transparencia – dos compromiso cu hopi ta papia di dje, pero tiki di berdad sa con pa hib’e.”
“Mi a bin ta observa cu desde cu RAIZ a wordo funda, tabata cla cu no a funda pa solamente sostene algun ciclo di eleccion sino, RAIZ a wordo funda pa transforma con politica ta wordo hiba na Aruba”, ta comentario di Señor Anthony Martina, Presidente, Partido RAIZ ta señala.
Plan Strategico: Despues di lunanan di trabou profundo cu Hunta di Directiva, candidatonan y boluntarionan, RAIZ ta cla cu su plan strategico: “Fortaleciendo Un plan di proyectonan pa reforma RAIZ di un plataforma pa un partido, y tambe reconecta e partido cu e pueblo di Aruba”.
Durante e proximo simannan, RAIZ lo anuncia su serie nobo di diferente actividad pa conecta y combersa cu comunidad, Academia di Bon Gobernacion, Sunset Talks y Cunucu Café, cu ta oportunidadnan pa por scucha, colabora, y crea cu e comunidad di Aruba.
Cu e transformacion aki, RAIZ ta sobrepasa e ciclo electoral y ta tuma su rol a largo plazo como un forsa politico cu bista riba futuro y guia pa nos balornan.
“Nos no ta simplemente bolbe. Nos ta bolbe mas fuerte, mas sabi y conecta cu e pueblo manera nunca prome” Señor Ursell Arends, Lider, Partido RAIZ a subraya.
