Fraccion di MEP:
ORANJESTAD (AAN): “Aruba mester tin transparencia y un plan concreto. Nos no por permiti pa e tensionnan na Medio Oriente afecta e cartera di nos famianan sin cu tin un strategia pa wanta e sla," ta loke Evelyn Wever-Croes, lider di Fraccion di MEP a declara despues di a entrega un peticion oficial pa un reunion urgente cu Minister Geoffrey Wever.
Como un partido cu ta actua cu seriedad, MEP ta compronde cu un economia chikito manera di Aruba ta vulnerabel. E tensionnan entre Merca y Iran por nifica un subida den prijs di gasolin y cuminda. Pa MEP, e bienestar di bo famia ta bin prome, y e mihor forma di proteha esaki ta door di ta prepara y no spera te ora e crisis t'ey caba. "Pueblo di Aruba merece sa cu nan representantenan ta traha cu responsabilidad. Nos compromiso ta pa garantisa stabilidad y cuida e placa cu bo ta traha duro pe tur dia," Wever-Croes a enfatisa.
MEP a pidi e reunion publico aki pa e Minister informa Parlamento y comunidad riba puntonan cu berdad ta conta pa bo bida diario:
(*) Analisis di Riesgo: Con e tensionnan aki por afecta nos importacion y turismo?
(*) Medidanan Concreto: Kico Gobierno ta bay haci awe y awo mes pa evita cu prijsnan lo keda subi?
(*) Scenarionan Realistico: Con nos ta prepara si e prijs di combustibel keda halto pa hopi tempo?
(*) Pasonan Preventivo: Con nos ta proteha bo confianza pa e economia no para?
Den momentonan di duda y insiguridad den mundo, e diferencia entre un politico cu ta djis papia y un cu ta traha ta den e accionnan aki. MEP ta demostra un biaha mas cu nan ta e bos di seriedad. "Nos no ta bini pa crea panico, nos ta bini pa exigi e profesionalismo y e transparencia cu Aruba tin mester aworaki. Nos compromiso ta cla: interes di pueblo prome, awo y semper.”
