ORANJESTAD (AAN): Otmar Oduber ta bisa cu mester pasa di un cuido curativo pa uno preventivo, di proteccion unda cu ta traha den forma adelanta riba e situacion di salud di nos pais.
E ta añadi cu ta pone hopi esfuerso y placa mientras cu ta sigui hiba awa lama door di kier duna servicio medico na comunidad, pero di otro banda no ta bezig ta cuidando nos ciudadania den su totalidad ‘at all’.
Tur e rapportnan cu a sali ultimo ta mustra cu obesidad ta sigui suta Aruba. No ta poniendo fondonan disponibel pa atende cu hendenan cu ta sufri di malesanan cronico manera entre otro sucu y presion, ta conduci na otro malesanan peor ora bira grandi.
Esakinan por ta pa medio di por ehempel enseñansa y campañanan di concientisacion di con por biba mas saludabel. Ademas di esaki, gobierno no ta duna ningun incentivo pa productonan cu por pone cu un hende ta biba mas saludabel.
Pa menciona algun, percura pa tin fruta y berdura na un miho prijs, mientras cu di otro banda a worde papia den pasado riba un sugar tax, pero esaki a keda den olvido pa falta di curashi of cohon di un gobierno of minister pa tuma e decision aki. Esaki posiblemente pasobra hopi biaha factornan externo ta hunga un rol, manera beneficionan personal di gruponan den comunidad.
“Ta yega momento cu nos mester para fuerte y bisa cu mester pensa riba introduccion di un tipo di sugar tax na Aruba, pero na mes momento percura pa prijs di productonan cu si ta saludabel y na beneficio di comunidad haya e incentivonan necesario pa por reduci e prijs”, Otmar Oduber a declara.
