Fraccion AVP:
ORANJESTAD (AAN): Fraccion di AVP den Parlamento kier expresa su felicidad y orguyo pa cu e prome aña di gobernacion di e coalicion AVP–Futuro, un gobierno cu, for di prome dia a demostra claramente cu e ta banda di pueblo, cu ta traha cu determinacion y cu e tin e meta pa pone Aruba riba un caminda mas fuerte y sostenibel.
E prome aña di gobernacion ta marca un periodo di reconstruccion, reordenacion y implementacion di manehonan cu ta tene como prioridad e bienestar di nos comunidad. Despues di añanan cu pueblo a sinti hopi tension y carga riba nan lomba, e gobierno AVP–Futuro a bay dilanti cu un direccion cla: traha pa un Aruba mas visibel internacionalmente, sigur y mas stabiel.
Gobierno cu ta pone pueblo prome
Durante e prome aña aki, e gobierno AVP–Futuro a enfoca riba e cosnan mas esencial: duna pueblo mas confiansa den gobierno, traha pa mehora e servicionan basico, y fortalece e economia pa crea mas oportunidad.
Fraccion AVP ta constata cu e coalicion a logra pone un estilo di gobernacion mas cerca di pueblo: mas accion den lugar di palabra.
Puntonan clave cu e gobierno ta trahando riba dje
Entre e prioridadnan cu e gobierno AVP–Futuro a enfoca riba nan durante e prome aña, Fraccion AVP kier resalta e siguiente puntonan:
- Fortalecemento di finanza publico y disciplina fiscal.
E gobierno a mustra responsabilidad pa maneho di e finanza di pais, cu un enfoke riba reduccion di desperdicio, mas control riba gasto publico y e buskeda di un Aruba financieramente mas saludabel.
- Inversion den bienestar social y sosten di e famianan. Cu e meta pa cu pueblo por sinti alivio, e gobierno a traha riba mehoramento di programanan social y apoyo pa e famianan cu ta pasa dificultad, cu atencion special na e personanan vulnerabel y nos grandinan y acceso na mas remedi pa nos comunidad.
- Mas enfoke riba educacion y desaroyo di hubentud. Coalicion AVP–Futuro a reconoce cu futuro di Aruba ta depende riba educacion. Pa e motibo ey, e gobierno a traha riba iniciativanan pa fortifica e sistema educativo y a cuminsa cu 9 miyon florin pa yuda e sistema salarial den enseñansa, tambe crea mas oportunidad pa estudionan pa nos hubentud.
- Siguridad y orden publico.E gobierno a pone siguridad como un pilar importante, trahando riba colaboracion entre instancianan, mehoramento di capacidad y fortalecemento di e structura pa combati criminalidad y proteha nos comunidad.
- Reforma y modernisacion di servicio publico.Un gobierno eficiente ta un gobierno cu ta sirbi pueblo. Den e prome aña, e coalicion a bin cu un impulso pa modernisa proceso, mehora eficiencia, y fortalece e servicio civil pa por atende ciudadano mas lihe y mas profesional. Ainda tin retonan grandi, pero tin atencion pa cu esaki.
- Economia y crecemento sostenibel E gobierno AVP–Futuro ta trahando pa diversifica e economia y crea un base mas fuerte, cu enfoke riba empleo, inversion y sostenibilidad, pa cu Aruba no keda dependiente riba un solo sector.
Un gobierno di stabilidad y direccion
Fraccion AVP ta di opinion cu e coalicion AVP–Futuro a logra duna Aruba un sentido di stabilidad, algo cu ta esencial pa e confiansa di inversionistanan, e sector priva y e pueblo. Gobierno a mustra cu e tin e boluntad pa tuma decisionnan cu ta dificil, pero necesario pa e bienestar di nos isla na largo plazo.
Mensahe di agradecimento y compromiso
Fraccion AVP kier felicita Minister-President Mike Eman y demas minister y tur funcionario publico cu ta contribui diariamente pa logra e metanan di e gobierno. Tambe nos kier gradici pueblo di Aruba pa nan confianza y pasenshi, pasobra nos ta consciente cu hopi reto tin ainda nos dilanti y pa soluciona. Awor den oposicion contrincantenan politico tin tur sorto di solucion y ora a toca turno na nan, no a actua pa trece solucionan duradero.
Nos mensahe ta cla: e prome aña a demostra cu Aruba ta riba e caminda corecto, pero e trabou ta continua.
Siguiendo cu determinacion pa un Aruba mas fuerte
Fraccion AVP ta reafirma su compromiso den Parlamento pa sigui traha, controla, propone y contribui cu iniciativanan cu ta beneficia pueblo.
Cu unidad, responsabilidad y amor pa nos patria, nos ta sigui cu e mision: Un Aruba cu ta prospera, cu ta cuida su pueblo y cu ta traha riba bienestar di tur cu ta stima Aruba y biba riba Aruba.
