Un 36 % di poblacion a indica cu nan ta spaar menos y 20% no por ni spaar nada

Parlamentario Edgard Vrolijk:

ORANJESTAD (AAN): Parlamentario Edgard Vrolijk a tuma nota di e Consumer Confidence Survey Report 2025-I, unda cu esaki ta confirma locual nan a bin ta bisa pueblo cu desde entrada di e Gabinete nobo aki AVP/ FUTURO. Pueblo di Aruba ta wak cos hopi mas negativo compara cu e Gabinete anterior. Pero sigur den e encuesta aki pueblo mes ta vocifera cu costo di bida ta asotandonan y ta haci cu nan poder di compras a bay mas atras cu nunca compara cu final di 2024 y cu e proyeccion ta negativo mirando cu segun e encuesta e situacion den e siguiente 6 lunanan lo bira pio. Y den e cuadro aki di e encuesta bo lo por confirma cu Minister Geoffrey Wever oficialmente por ser yama e Minister di Inflacion. 

Puntonan di precupacion di e encuesta di Banco Central

Banco Central den e encuesta ta ilustra locual pueblo a trece dilanti y ta locual nos a bin ta bisa cu Minister Wever y Gabinete AVP/FUTURO ta desconecta cu pueblo. Den ultimo reunion publico cu Minister Wever el a bisa cu pueblo ta contento cu nan y cu 99% di prijsnan a keda mescos of a baha di prijs y awe Banco Central ta bisa lo contrario locual cu pueblo ta experiencia:

• 94% di e pueblo ta bisa cu prijsnan a subi barbaramente e ultimo lunanan y ta negativo pa esaki e siguiente 6 lunanan.
• 83% di pueblo ta bisa cu nan placa no ta rindi mas pa compras compara cu december 2024.
• Condicionan pa haci negoshi a detoriora.
• 49% di e pueblo ta sinti cu e proximo lunanan nos situacion financiero di pais lo deteriora unda aña pasa esaki tabata apenas 27%.
• 44% di famianan ta sinti cu nan situacion lo sigui bay atras debi na e costo di bida cu ta asotandonan compara cu apenas 26% na 2024.
• 36 % a indica cu nan ta spaar menos y 20% no por ni spaar nada. 

Pues na man di Gabinete AVP: FUTURO pueblo tin desconfiansa total pero sigur ta ser asota c’un costo di bida for di control unda cu a priminti pueblo cu den 100 dia pueblo lo conoce rebaho den prijs y sigur e frigidairnan lo ta yen atrobe. 

Minister di Inflacion Wever no tin un plan

AVP y FUTURO a bai eleccion y bisa pueblo cu nan lo baha prijsnan y lo yena tur frigidaire di e pueblo na Aruba den 100 dia, pero locual pueblo ta experencia ta cu Minister di Inflacion Minister Geoffrey Wever keto bay no tin un plan pa baha prijs y pio ainda con pa combati e aumentonan diario cu pueblo ta experiencia.

Tur ora bay ta bezig cu estudionan, pero no tin un plan concreto pa 4 aña caba. E unico cos concreto cu Minister di Inflacion Geoffrey Wever tin ta con pa zorg pa candidatonan di FUTURO si por tin FUTURO y contractanan cu amigonan, mientras pueblo ta sufri na su man y e Gabinete Burdugo AVP/ FUTURO cu a priminti pueblo cu den 100 dia lo yena tur firgidaire y baha tur prijs na Aruba. Locual pueblo ta experienciando ta net lo contrario unda tin aumento feroz di prijsnan .

Y banda di esaki tambe Minister di Inflacion Wever a percura pa tira cuater (4) fiesta riba custia di pueblo cu a costa en total casi 1 miyon florin y unda na final kier purba benta poco stof den wowo di pueblo.Nan wowo por ta yena cu stof pero nan ta sinti e cartera y e frigidaire bon bashi y pa colmo cu aumento di gas hasta miedo nan tin di cende nan stoof. 

Minister di Inflacion so por y mag di biba bon

Na Aruba e Minister di Inflacion Geoffrey Wever so por y mag biba bon, mientras pueblo no por spaar y pio pueblo no por cumpra casi nada mas, paso prijsnan ta bai halta cada dia. Mientras e Minister no tin un plan con pa yuda pueblo, e si tin un plan y placa cu e por bay un luna di vakantie den Europa unda su cartera si ta rindi anto na Euro, mientras Minister di Inflacion Wever tin e pueblo eyfo masacra cu prijsnan creciente, aumento di prijs gas y nan frigidairnan ta mas bashi cu nunca y riba dje no kier pasa e ley di Mininimumloonuur pa paga e homber chikito lo husto y yudanan cu nan poder di compra. 

Awo pueblo ta wak cada dia cu e Gabinete Burdugo AVP/ FUTURO ta cana rond hunga bunita corta mata y piki sushi, pero pueblo eyfo ta sinti un falta di vision pa contene costo di bida y ta haciendo e pueblo deliberadamente mas pober pa asina bin strooi aki aya tiki honing y purba cambia percepcion. Sin embargo, e encuesta di Banco Central ta ilustra e realidad cu nos pueblo ta biba aden na man di e Minister di Inflacion Geoffrey Wever y Gabinte Burdugo AVP/FUTURO unda cu tur amigo, sponsernan y candidatonan y ex candidatonan mag biba bon riba custia di pueblo y e homber y muhe trahado mester keda pena y paga belasting pa nan por biaha y goza.