Minister Glenbert Croes: Hidrogeno ta e futuro:
ORANJESTAD (AAN): Ta bisto cu tur locual ta bon pa Aruba ta malo pa AVP. Of ta pasobra cu no ta nan a logr’e?
Hidrogeno ta e energia di futuro. Y si como pais bo kier haci un diferencia y haci un inversion pa futuro generacion, e futuro ta awo. Ta awo mester tuma decisionnan.
E proyecto Secrets, cu lo trece un boost pa
San Nicolas; e reactivacion di e refineria, otro boost pa San Nicolas; e zona di refineria cu lo bira e industria energetico pa nos Pais, cu e vision pa region; tur lo reactiva economia di San Nicolas, cu lo bira e otro pilar economico pa nos Pais. Pero pa AVP, tur locual cu ta bon pa Aruba, ta malo pa nan. Esaki ta pasobra cu a cera porta pa e partido cu ta brasa corupcion.
Si ta asina malo Secrets cu EAGLE LNG ta pa Aruba, pakico AVP a pidi ambos proyecto pa warda te ora nan ta den Gobierno pa nan por pronkia cu pluma di otro? Esaki ta demostra un biaha mas cu nan interes no ta pa Aruba pero pa posibel actonan corumpi cu nan lo por haci. Pero tur porta pa corupcion a cera.
Si Hidrogeno no ta bon, pakico Hulanda ta bay inverti 200 miyon di euro den Aruba, Corsou y Sint Maarten pa cu transicion energetico? Un inversion cu e Caribbean Climate and Energy Conference organisa pa Aruba y Hulanda mei ultimo, a logra.
Pero e dolor di AVP ta cu nan fiesta di corupcion den RDA a caba pasobra ainda ta fresco den nos memoria e drama di Citgo, unda cu e ehecutivonan cu a negocia cu Mike Eman, Mike de Meza y Richard Arends, a termina encarcela na Merca pa corupcion.
Porta a cera. Aruba ta liber di coruptonan. Aire fresco di bonansa pa nos pueblo, ta supla atrobe riba Aruba.
Aruba tin su futuro den su man bek!
