Parlamentario Dangui Oduber:
ORANJESTAD (AAN): Ta apenas siman pasa Prome Minister Jetten tabata na Aruba pa discuti diferente topiconan cu Gabinete AVP-Futuro.
Nos a mira masha hopi potret di reunion y encuentronan entre Gobierno di Aruba y Prome Minister Jetten. Nos a asumi cu Gobierno lo a adresa e retonan cu pais Aruba tin, como tambe atende cu e temanan di mas importante. Esaki a resulta di NO ta e caso. Paso pa nos sorpresa, e siman aki tres minister di Gabinete AVP-Futuro a subi avion rumbo pa Hulanda pa bay fiesta y celebra. Ta trata aki di Prome Minister Mike Eman, Minister Gerlien Croes y Minister Geoffrey Wever.
Un "snoepreisje" innecesario riba costo di pueblo
Un biahe sin agenda, sin sentido, sin proposito y sigur sin urgencia. Esaki ta totalmente inaceptabel, mirando e hecho cu apenas siman pasa varios a tuma lugar entre Gobierno di Aruba y e mandatario Hulandes, Jetten. E biahe aki a costa e pagado di impuesto mas di 100.000 florin. E ministernan no a biaha nan so; nan a hiba un delegacion completo cu ta inclui consehero como tambe secretaria di Conseho di Minister. Loke nos a compronde ta cu nan tres a bay Hulanda specialmente pa e fiesta di e Minister Plenipotenciario, Milly Schwengle. Esaki tabata e unico motibo real di e “snoepreisje” aki.
Mientras pueblo ta wordo strangula cu prijsnan halto y famianan ta pasando den necesidad, Gobierno ta scoge pa biaha, fiesta y derocha placa di pueblo. Ki necesidad tabatin pa no uno, ni dos, sino tres minister biaha pa Hulanda pa un fiesta? Berdad esaki tabata un prioridad? Berdad esaki tabata necesario?
Promesanan bashi: Pueblo ta sufri, mientras Gobierno tin surplus
Na e momentonan aki, e prijsnan di gasolin, diesel, gas y hasta pan a kibra tur record existente. Nunca antes e prijsnan aki tabata asina halto! Tin sla di prijs tur caminda; unda cu pueblo bira, mientras cu a priminti pueblo cu costo di bida lo baha y poder di compra lo mehora. Awe nos ta mira cu promesanan no a wordo cumpli. Costo di bida ta totalmente for di man, poder di compra a bay atras cu stapnan grandi y, consecuentemente, pobresa ta sigui crece.
E bestaansminimum pa un famia di cuater a bira 5.552 florin, locual ta representa un aumento significativo atrobe.
Un gobierno serio lo a adresa e retonan aki. Nan tin un surplus di 500 miyon florin, pero e placa aki NO ta yega na e pueblo! Nan ta broma cu ratingsnan positivo, nan ta broma cu situacion financiero saludabel, mientras e cartera di nos hendenan ta na grito. Pueblo a wordo manipula y gaña cu e situacion financiero lo mehora. E realidad? Nunca antes den historia, Aruba tabata asina impagabel! Esaki ta un gobierno sin oido y sin sinti pa esunnan den mas necesidad. Nan ta biaha, nan ta fiesta, nan ta gosa... y pueblo ta sufri!
