Parlamentario Jennifer Arends-Reyes:
ORANJESTAD (AAN)-- Segun Parlamentario señora Jennifer Arends-Ruiz, e aspecto di transporte tambe ta keda un “bottleneck” teniendo na cuenta e aspecto di trafico.
El a bisa cu como hende local tambe tin biaha ta keda pega den trafico for di trempan, y mester wak con pa habri e camindanan.
“Nos tin e presupuesto di DOW cu ta bay bin, nos ta bay yama e Minister di Infrastructura, pa wak cual ta e camindanan cu ta bay duna alivio na e parti di trafico.
“Ami ta compronde e parti di e taxistanan. Nan tambe tin diferente organizacion y ta bon pa nan bin hunto pa papia tocante e retonan cu nan tin, pasobra ken ta bay traha e shift di anochi, con nan ta bay hink’e den otro. Tur esakinan ta puntonan cu nan lo ta desea di papia cu ne, di papia cu e minister encarga y cu nos di Parlamento.
“Tambe tin e parti di lista di prijs, cu nan tabata menciona pa hopi tempo. Kiermen, mi ta kere cu tin varios aspecto cu mester wordo soluciona, of papia, en todo caso, pa yega na un acuerdo cu nan por tin un miho entendimento cu transporte. Sin conta e transporte pirata cu ta existi, y transporte publico”, Parlamentario Arends-Ruiz a señala.
Finalmente, el a indica cu, con pa organiza Aruba, ta algo cu ta wordo papia pa añanan y e ta keda un punto cu mester dun’e atencion, añan ta pasa y tin cambionan ta tuma lugar, manera e infrastructura, e demografia, e demanda ta aumenta, y akinan tambe mester bira serio riba unda nos kier bay y nos vision pa cu Aruba.
