Parlamentario Jennifer Arends-Reyes
ORANJESTAD (AAN): Na ocasion di Housekeeping Week, parlamentario Jennifer Arends-Reyes ta felicita tur trahado di housekeeping na Aruba y gradici nan pa e dedicacion cu nan ta mustra den nan trabou diario.
“Hopi biaha nos ta drenta un camber di hotel of un espacio limpi y ordena, sin pensa den tur e trabou cu tin tras di esaki. Tin hende cu ta cuminsa nan dia tempran, ta traha duro y ta pone atencion den cada detaye pa otro hende por sinti nan comodo y bon bini. E siman aki ta un bon momento pa para keto y bisa nan: masha danki,” Jennifer a expresa.
Como presidente di e Comision di Turismo di Parlamento, Jennifer ta reconoce e contribucion di e trahadornan di housekeeping na e experiencia cu nos bishitantenan ta hiba di Aruba. Un camber bon cuida y e atencion personal di un trahado por haci un gran diferencia den e estadia di un huesped.
“Nos ta papia hopi di calidad den turismo. E calidad ey ta cuminsa tambe cu e personanan cu ta cuida nos cambernan y espacionan tur dia. Nan esfuerzo ta parti di e hospitalidad cu ta haci Aruba special.”
Jennifer ta destaca cu aprecio pa e trahadornan mester sigui durante henter aña: den e manera cu nan ta wordo trata, e atencion pa nan bienestar y e oportunidadnan pa nan sigui desaroya.
“Pa tur trahado di housekeeping: mi kier felicita boso di curason. Mi sa cu boso trabou ta exigi hopi esfuerzo, paciencia y dedicacion. Boso por ta orguyoso di e contribucion cu boso ta haci. Masha danki pa cuida cada detaye y pa duna tanto di boso mes den boso trabou. Masha pabien cu Housekeeping Week!”
