Pa bira Minister Presidente ora Mike Eman baha:
- Jayburtt Dijkhoff ta cuestionando seriamente
ORANJESTAD (AAN): Jayburtt Dijkhoff, PhD, Presidente di Fundacion SIKI, den entrevista cu Matutino DIARIO, ademas di e tema di HOFA, cu Raad van Advies a señala cu e ta ataca nos propio Constitucion, Jayburtt Dijkhoff a enfoca riba e acuerdo di Gobernacion cu e Gabinete actual a firma, unda cuater nomber ta aparece pa e funcion di Minister Presidente.
Dijkhoff a bisa cu ora el a bay revisa bek, riba e mesun acuerdo di Gobernacion di e Gabinete AVP-Futuro aki, y cu manera tur hende por wak riba e website di Gobierno, basicamente por wak cuater nomber riba dje, cu ta mr. Mike Eman, señor Wendrick Cicilia, señora Gerlien Croes, y señor Geoffrey Wever como candidatonan pa un funcion presidencial.
“Basicamente, e acuerdo di Gobernacion ta bisa cu esaki ta e candidatonan pa un funcion presidencial di pais Aruba.”
“Nos sa cu un di nan ta bahando dia 1 di Januari 2027, e otro cu tabata presidente di e partido mas grandi no a haya e funcion di Prome Minister pasobra e argumento ta cu el a caba di cuminza su carera politico, specialmente den funcion di Minister. E no a bira y esey ta haci cu e reglanan a cambia door di e situacion ey. Si nos wak’e bon, e mester a bira Prome Minister. Awo, e pregunta ta di con no a puntra e ora ey señor Cicilia, si e kier bira Prome Minister? Of, señora Gerlien Croes? Of señor Geoffrey Wever? Pasobra ta nan ta para den e acuerdo di Gobernacion”, Jayburtt Dijkhoff a cuestiona.
Dijkhoff a expresa, ta wordo menciona cu otro nomber enberdad ta wordo menciona, cu ta bay bira candidato di Prome Minister.
“Pero e pregunta ta, di con un otro candidato cu no ta para den e acuerdo di gobernacion ta bula riba cabes di meneer Cicilia, pa bira Prome Minister, a base di kico y cual autoridad!” Jayburtt Dijkhoff a señala.
“Pero en realidad e candidato ey ta bulando riba tres cabes”. Riba e observacion aki di DIARIO, Jayburtt Dijkhoff ta di acuerdo cu esey ta e caso y cu nan mester a wordo puntra prome si nan ta goza di e sosten di Parlamento completo, of alomenos di mayoria”.
“Pa por bira Prome Minister mester goza di e confianza di Parlamento, pa por haci e trabao. Basicamente, nan propio reglanan ta bisa cu enberdad Partido AVP tin mayoria di asiento, pero e no por bula over e regla cu den negociacion mester puntra e tres nombernan aki si nan ta apto pa tuma e funcion aki, prome cu bin cu otro persona. Mi no ta mira cu esey ta pasando den e discusionnan actual. Mi ta kere cu ta bon pa informa pueblo kico ta e reglanan legal na e momento aki, entorno di propio conducta y door di falta di otro reglanan”, Jayburtt Dijkhoff PhD, Presidente di Fundacion SIKI a remarca.
