Lider di MAS, Marisol Tromp:
ORANJESTAD (AAN)—Segun lider di Partido MAS, señora Marisol Tromp, tempo cu el a asumi e cargo di Minister di Infrastructura reemplazando Otmar Oduber, locual el a haya tabata un situacion na werki, di varios caso di corupcion cu el a haci aangifting riba nan, y a start investigacionnan.
Esaki tabata den tempo di pandemia el a institui comisionnan pa acelera e trabaonan, apesar cu hopi departamento tabata plat, trahadornan tabata malo, tabata tin shelter in place, etc.
Tromp a bisa cu den e ocho lunanan cu el a keda como minister, pasobra el a wordo baha pa e mesun gobierno cu ta na mando, door di compati corupcion, e trabaonan cu el a haci por wak nan pasobra nan ta documenta.
El a subraya cu e realidad ta kico a pasa prome cu e tabata minister y kico a pasa despues di esaki. Prome cu ne, tabata tin un situacion unda cu despues cu Otmar Oduber a baha como minister, premier Evelyn Wever-Croes a tuma e cartera, pa e lapso di un luna.
Despues Marisol a haya e cartera pa cual e no a haya traspaso, sin cu a haya documento di ningun caso. Tromp a subraya cu el a enfoca masha hopi mes den e parti di hendenan cu por planta, riba e aspecto di “fast track”, den hendenan cu por haya un tereno pa planta fruta y berdura den nan cura, etc. El a señala cu ora el a wordo baha e por a mira un minister presidente cu a keda practicamente lam, cu a bisa cu e ta duna otro hendenan e documentonan di e departamento aki pa firma, pero esey, entre otro aspectonan, no a kita su responsabilidad como minister.
Marisol a indica cu Minister Presidente no a logra resolve ningun reto cu e tin. El a indica tambe cu investigacionnan cu el a inicia cu por a trece claridad di, entre otro, e casnan di Seroe Colorado. El a start investigacion riba dje pero te awe e no a tende nada mas di dje. El a bisa cu e no sa si Minister Presidente a stop e investigacion aki.
Tambe el a cuminza investigacion riba DIP mes, Serlimar, etc., y te cu awe tres aña despues e no a mira resultado.
El a expresa cu ora di puntra Minister Presidente nunca e sa di nada, y esey ta nifica cu e no kier duna claridad riba e trabaonan cu supuestamente lo ta pasando of lo no ta pasando nada. Como miembro di Parlamento Marisol Tromp no por bisa nada pasobra e no tin acceso na ningun documento di e departamento pero loke si e ta wak ta cu comunidad tin kehonan riba esaki.
