Parlamentario Rocco Tjon, fraccion MEP:
ORANJESTAD (AAN) Parlamentario Rocco Tjon, di Fraccion di Partido Movimento Electoral di Pueblo (MEP), a declara cu dia 28 di October Gobierno a bin den e sala di Parlamento, pa duna informacion tocante Rijkswet. Durante e reunion aki, nan a ricibi un carta di 13 sindicato den cual nan expone, a base di argumentonan huridico, financiero y economico, di con e Rijkswet HOFA aki no ta bon pa Pais Aruba.
“E reunion a sigui dia 10 di November. Nos ta lamenta cu durante e periodo ey, entre 28 di October cu 10 di November, Gobierno no a ni invita e sindicatonan aki pa scucha nan y compronde nan puntonan di bista. E parlamentarionan cu ta sostene Gobierno tampoco a haci esaki. Di parti di oposicion nos a haci esaki, y mas aun nos ta compronde nan argumentonan.”
“Nos ta lamenta tambe cu durante e reunion dia 10 di November, e sindicatonan a manda un carta adicional den cual nan ta puntra Presidente di Parlamento pa audiencia, prome cu e reunion den e sala aki a caba, y tampoco a wordo otorga, y awe nos ta confronta cu e hecho cu ayer’atardi a invita e sindicatonan pa un reunion y awe e sindicatonan a indica cu nan no por ta presente pasobra e ta un trabao grandi pa bo logra 13 sindicato den e sala aki”, Parlamentario Tjon a declara.
E parlamentario a menciona cu nan a manda e peticion mesora pa e presidente di Parlamento pa invita nan di nobo y scucha di nan ki dia nan lo por ta eyden presente y di e forma ey tur parlamentario por compronde nan posicion.
