Hopi hende ta sinti cu nan tabata autor di caida pesimo di e partido
- Bo simia ta planta den bon tera cu RAIZ
ORANJESTAD (AAN): Mundo sa dal buelta y ta conoci cu naturaleza semper ta recupera su mes despues di cualkier tragedia pa cuminza bek di nobo. Resultado di esey ta net esnan cu tabata profundamente meti pa a purba y a logra kibra acuerdonan palabra di antemano entre MEP y RAIZ, door di pusha cambio di President di Parlamento, y cu a pone cu Gobierno a cay. Y tambe bin cu conseho pa trece e locura pa introduci cambionan den dunamento di permiso di Taxi cu lo a kibra un gedogen beleid di hopi tempo cu tabata garantiza cu Taxistanan lo tin un ‘bon suma di placa pa bay pensioen cune’... a pone cu e Partido a cay plat abao manera un patia berde, y ta full out di Parlamento den tempo record, y perdiendo nan dos asiento.
Partido RAIZ riba Diaranson mainta a haci anuncio, cu tanto Parlamentario Misha Raymond, y nan candidato/consehero di Ministro, esta Carlos Guaimo ta afo for di e Partido. A lo menos por mira cu Partido RAIZ di trempan a cuminza haci un tan spera limpieza pa asina por cuminza bek for di su raiz.
Loke RAIZ a bisa: Diaranson mainta, Partido RAIZ a emiti un boletin pa splica cu simia ta planta den bon tera cu RAIZ.
Cu un aña nobo den porta, candidatonan, como tambe boluntarionan di Plataforma RAIZ kier tuma e oportunidad pa desea e pueblo di Aruba un prospero aña 2025 y alabes gradici y probecha di e oportunidad aki pa gradici tur e ciudadano di Aruba cu a haci uzo di nan derecho di vota.
Un danki specialmente ta bay na cada un di e 2,323 votadornan cu a wak nan mes refleha den e vision di RAIZ, un plataforma profesional cu a demostra cu gobernacion y politica na Aruba por wordo conduci exitosamente na un manera limpi, honesto y sin efecto negativo pa e trankilidad ni privacidad di nos ciudadanonan.
E team di RAIZ for di un principio a boga pa union den nos comunidad, respet mutuo y amor pa nos prohimo durante e ultimo Gabinete, y sigur den e ultimo campaña electoral. E vision di RAIZ ta pa uni e pueblo di Aruba, mirando cu pa hopi aña nos isla a conoce un cultura político basa riba division y antagonismo. Nos a haci un gran esfuerso pa trece cambio den esaki hibando un discurso di nivel y presentando nos puntonan di maneho na un forma profesional. Eleva e nivel di gobernacion di nos pais ta esencial pa garantisa cu nos comunidad lo por sigui biba den harmonia y na paz.
Awor cu temporada di campaña y dianan di fiesta a pasa plataforma RAIZ lo duna tur espacio y cooperacion pa e proceso di formacion di gobierno nobo por cana na un forma organisa y conforme locual ley ta prescribi. RAIZ ta preparando tambe pa e traspaso di cartera por bay na un forma debido y elegante, como debe ser. Mientrastanto, Plataforma RAIZ ta keda desaroya su mes y no ta para keto. Pueblo di Aruba a manda un señal cla pa nos plataforma y nos a cuminsa cu e proceso di reforma y reorganisa nos mes en preparacion di un proximo eleccion. Como parti di e proceso aki nos ta anuncia cu tanto Raymicheline “Misha” Raymond y Carlos Guiamo, candidatonan riba e ultimo lista di RAIZ, no ta forma parti di e plataforma mas. Nos ta gradici ambos pa nan colaboracion y dedicacion durante nan tenura cu RAIZ y ta deseanan tur clase di exito.
RAIZ tambe kier tuma e oportunidad akinan pa felicita tur e partidonan cu a logra haña asiento y alabes ta felicita tur a parlamentarionan cu ta huramenta pa sirbi nos pais, specialmente e parlamentarionan cu pa prome biaha lo funciona den e organo di mas halto di nos pais. Locual nos isla tin mester di dje urgentemente, ta un gobierno cu kier traha pa e beneficio general di nos pais y su hendenan sin desvia ningun instante for di nan compromiso y responsabilidad. Ta ora pa pone tur diferencia un banda pa asina e futuro gobernantenan y representantenan cu a wordo eligi door di nos pueblo, asumi e tarea cu nan a priminti durante campaña electoral 2024.
Aruba, e simianan cu RAIZ a planta pa un politica di integridad y union a tuma tera y ta creciendo den e luganan cu lo haci e diferencia. Plataforma RAIZ t’ey pa keda y pa traha pa e Aruba cu nos tur kier biba riba dje. Danki un biaha mas pa e confiansa y sosten. Danki Aruba!
Pa forma parti di nos plataforma, bishita www.raizaruba.com y inscribi como boluntario.
