MEP na Clifford Heyliger di AVP
ORANJESTAD (AAN): Den e dianan aki por mira e parlamentario nobo di AVP Clifford Heyliger, cu un atake formal contra MEP, siendo cu MEP no a hacie net net nada.
Ta obvio cu Clifford Heyliger su mes no a skirbi tur e articulonan cu un lenguage asina baho, sino cu ta e PR di AVP a skirbi p’e, y e mester djis ripiti loke nan bis’e. Esey ta e forma di opera di partido AVP cu nan politiconan nobo.
Loke a resalta mesora, un biaha mas, ta cu Heyliger no conoce su trabou, tarea ni su responsabilidad como parlamentario. Algun dia prome e kier a gewoon cana drenta un departamento di gobierno pa papia cu empleadonan, pero esey no por, y corectamente nan a nenga Heyliger entrada.
Den e caso di WEB e mester realisa cu e tin un OTRO rol awor, no di sindicato ni empleado di WEB mas.
Den su comunicado e ta ataca miembronan di hunta di supervision di corupcion, pero no ta bisa kico specificamente. Bo no por lanta ta ataca hendenan profesional, sin base. Esey ta totalmente inaceptabel.
Despues den e mesun comunicado e ta referi na kehonan cu nan a entrega na OM como sindicato, cu OM a contesta caba. Awor e kier trece tur esey dilanti atrobe awo como parlamentario? A caso e ta kere cu parlamento por 'overrule' OM?
MEP sa si cu e parlamentarionan di AVP y di Futuro ta nobo y no ta compronde e trabou ainda. No por tuma nan na malo. Hopi di nan no ta compronde e trabou y falta di experiencia y informacion. Ta bon pa Presidente di Parlamento yuda nan den esey. Pero esey no ta hustifica cu nan ta ataca profesionalnan local.
Ta bon pa parlamentario Clifford Heyliger haci su propio investigacion prome, y no haci “klakkeloos” loke AVP bis’e. No comete e blunder di Bermudez cu a pasa berguensa pa via di Gerlien Croes.
