Segun Parlamentario Evelyn Wever-Croes:
* MEP a firma pa negocia y drecha e condicionnan di Hulanda
ORANJESTAD (AAN): Parlamentario Evelyn Wever-Croes, den conferencia di prensa di Fraccion di MEP dialuna mainta ultimo, a indica cu keto bay Minister di Economia y Finansas Geoffrey Wever, den su encuentonan den scondi cu gremionan, keto bay ta uzando e argumento cu ta Partido MEP y Evelyn Wever-Croes a firma pa e ley di Reino HOFA mientras cu awo Partido MEP ta contra. Un biaha mas e parlamentario ta trece riba mesa kico el a firma y kico Prome Minister Mike Eman y Minister Gerlien Croes di Gobierno AVP Futuro a firma.
“Kico ami a firma?” E ta enfatisa cu loke el a firma na 2024 ta un acuerdo di intencion pa bay negocia. Esaki ta un documento di tres pagina cu a caduca na mei 2025. “Kico ami a firma? Ami no a firma pa HOFA. Den e acuerdo cu nos a firma na 2024, nos a firma pa bay negocia pa drecha e condicionnan cu ta exigi di nos. Pasobra Hulanda a pone cuchiu na nos garganta na 23 pa nos firma un acuerdo na interes di 6.9 %. Si nos no a firma dia 9 di october 2023, nan a menasa nos cu nan mes ta manda nos den default”, Parlamentario Wever-Croes a expresa.
El a splica cu esaki kiermeen cu Aruba lo a haya problema cu tur banco rond di mundo. El a enfatisa cu e menasa di Hulanda tawata por escrito y e carta aki ta disponibel pa tur hende lesa.
Na 2024, e gobierno Wever-Croes, a bolbe firma pa drecha e condicionnan di Hulanda pa baha e interes di 6.9 %. “Pasobra nos a haya esaki tawata un abuso cu Aruba mester paga na 6.9 % y Hulanda gana e placa aki riba nos tur aña. Esaki ta loke nos a firma, pa cuminsa cu negosacionnan pa drecha e condicionnan di Hulanda”, el a remarca. El a duna di conoce cu e negosacionnan a termina na momento cu AVP Futuro a finalisa e negosacion den e ley di Reino HOFA.
“Kico Minister Geoffrey Wever a firma?” Loke Minister Wever a firma ta HOFA, e ley di Reino di 51 pagina. Esaki, e Secretario di Estado Eric van der Brug a declara y confirma tambe, cu ta e gobierno actual, AVP Futuro a bay di acuerdo cu e ley di Reino HOFA.
Segun Wever-Croes: “Ami tin hopi luna ta splica kico ami a firma. Bo a yega di scucha Minister Wever y AVP Futuro splica loke nan a firma? Esaki si nan no ta splica. Ami a firma pa negosacionnan sigui pa drecha e condicionnan cu Hulanda a impone y e acuerdo aki a caduca na mei 2025. E gobierno AVP Futuro a continua of a cuminsa bek cu e negosacionnan y a yega na e ley di Reino HOFA”.
Parlamentario Evelyn Wever-Croes a enfatisa cu a yega ora pa Prome Minister Mike Eman, sali y splica kico e y Minister Gerlien Croes a firma y no keda manda Minister Wever pa splica. Aunke, segun e, esaki no ta relevante mas, pasobra awo nos tin un realidad nobo nos dilanti cu ta consehonan oficial di Raad van State y Raad van Advies di Aruba cu ta bisa cu e ley di Reino HOFA ta limita nos autonomia y nos constitucion, cu ta oke AVP Futuro a firma.
