Parlamentario Evelyn Wever-Croes:
ORANJESTAD (AAN): “Ley di Reino HOFA no ta di acuerdo cu e palabracionnan cu Gabinete Wever-Croes a haci den e acuerdo di 2024”, asina Parlamentario Evelyn Wever-Croes a expresa dialuna mainta den conferencia di prensa di Partido MEP. Wever-Croes a reacciona riba expresionnan di Secretario di Estado van der Burg cu ta bisa cu ta e a firma ley di Reino HOFA.
Documento di tres pagina versus documento di 51 pagina: Na 2024, Gabinete Wever-Croes a yega na un acuerdo, documento di tres pagina, cu lo bay cuminsa negocia. E gobierno actual hunto cu Hulanda a yega na e acuerdo, documento di 51 pagina, na aña 2025, di un ley despues cu negocia.
Bestuurlijk Akkoord versus ley di Reino HOFA: Gabinete Wever-Croes a yega na un ‘Bestuurlijk akkoord’ cu Hulanda na 2024. Esaki, el a mustra y indica cu loke su gobierno a acorda y firma na 2024 ta un documento di tres pagina. Y e gobierno actual a firma un documento di 51 pagina cu awo a bira e ley di Reino HOFA. E dos documentonan no ta di acuerdo cu otro tampoco.
Intencion pa bay negocia versus resultado di negosacion: Gabinete Wever-Croes a traha riba e documento di tres pagina. Durante gobernacion di Gabinete Wever-Croes nunca a mira e documento di 51 pagina y no a traha riba dje tampoco. E acuerdo di Gabinete Wever-Croes ta un intencion pa bay negocia. E acuerdo di AVP Futuro ta e resultado di negosacion cu a core pa cuenta, responsabilidad y risico di AVP Futuro.
Un no ta mara nos versus un cu ta mara nos: E documento di tres pagina, no ta ‘bindend’. E no ta mara Aruba. Segun Wever-Croes, e acuerdo di 51 pagina, ora e bira ley, e ta mara e generacion aki y esunnan cu lo bin. Pasobra Hulanda no ta laga bay nunca mas di e ley di Reino HOFA. Y na Aruba, no por cambia e ley. Solamente Hulanda por cambia esaki.
Acuerdo caduca versus acuerdo vigente: E acuerdo di tres pagina cu Wever-Croes a firma na 2024 tempo e tabata Prome Minister di nos pais, a caduca na mei 2025. E no ta existi mas. Den e documento ta para cu si pa mei 2025, Aruba no yega na un acuerdo, e interes ta bay bek na 6.9%. Y esaki a pasa tambe. Asina mes, Parlamentario Wever-Croes a expresa, Gobierno AVP Futuro a dicidi pa sigui negocia na 2025. Y esaki so ta loke tin riba mesa awo, e acuerdo di 2025 di AVP Futuro, cu ta vigente.
“Ni van der Burg ni e gobierno actual kier papia di loke nan a firma y su contenido. Pero nan kier keda papia di loke ami a firma. Esaki ta bastante iresponsabel”, Parlamentario Wever-Croes a enfatisa.
Segun e, ta tempo pa nos pasa over di ken a firma, y bay riba loke ta riba mesa actualmente enfatisanado cu loke cu el a firma no ta existi mas. Y loke ta riba mesa ta e acuerdo di 51 pagina cu, segun cu el a expresa, ta e veneno.
