Segun Parlamentario Evelyn Wever-Croes:
ORANJESTAD (AAN): Den edicionnan semanal di ‘Kico ley ta bisa’, Parlamentario Evelyn Wever-Croes a elabora riba e ley cu ta regla e reparticion di responsabilidadnan di ministernan, e Landsverordening Instelling Ministeries (LIM). Esaki ta e ley cu ta determina con responsabilidadnan ta wordo reparti entre e diferente ministernan den Gobierno di Aruba.
E LIM ta describi cua minister ta responsabel pa cada area di maneho. E ley aki por wordo adapta cada biaha cu tin un Gobierno nobo, pasobra e reparticion di tareanan por cambia. Por ehempel, infrastructura y medio ambiente por cay bou di responsabilidad di un solo minister den un Gobierno, mientras cu un otro Gobierno por dicidi pa reparti e areanan aki entre diferente minister.
E importancia di e ley aki ta, segun Wever-Croes, cu e ta defini exactamente kico cada minister por haci y unda su responsabilidad ta termina. E hecho cu un persona ta minister no ta nifica cu e por tuma decision riba tur area. Cada minister tin tareanan specifico defini den ley, mester duna cuenta pa su maneho y no mester interveni den e tereno di responsabilidad di un otro minister.
E LIM ta esencial tambe pa Parlamento por cumpli cu su tarea di controla. E ley ta yuda parlamentarionan sa cua minister mester wordo cuestiona of controla tocante un tema specifico.
Principalmente pa ciudadanonan, e ley aki ta igualmente importante. E ta yuda cada persona pa sa na cua minister e mester acudi ora e tin un pregunta, un problema of necesidad di asistencia.
“E ta hopi importante pa tur hende sa con e ley aki ta hinca den otro, pa asina abo como ciudadano tambe conoce bo derechonan y bo por ta para mas fuertemente”, Parlamentario Wever-Croes a enfatisa.
