Marco Berlis ta reitera pa pueblo ta bon informa: *Pero awo nan ta haci manera nan ta worry!
ORANJESTAD (AAN) – Parlamentario Marco Berlis, di fraccion di MEP, a señala den conferencia di prensa di su fraccion, cu un di e asuntonan cu el a subraya durante e reunion publico di siman pasa, tocante e Ley di LIM ta cu diferente punto a bin dilanti, y un di nan ta cu ora e temanan di loonsubsidie y FASE a wordo trata, Partido AVP a vota contra esaki.
Berlis a bisa cu hopi hende a pone den comentario, cu nan no ta sigur si esaki ta berdad, y pesey den e conferencia aki di fraccion di MEP, el a presenta e papelnan unda por a mustra e votacion claramente, cu esey ta e caso.
Segun e parlamentario, ta importante pa e pueblo di Aruba ta bon informa, cu no ta trata di color politico, sino di Aruba, hogarnan, pa e habilidad di por a pone pan riba mesa y otro gastonan;
AVP a vota contra pa negoshinan por a sigui opera, a vota contra e trahador chikito, y mientras cu hendenan na cas tabata busca manera con pa sostene nan famia, AVP a vota contra e yudanza aki, y e ta haya esaki hopi condenable y lamentable, y pesey ta bon pa pueblo ta bon informa kende nan ta apoya, y cu ken nan ta para.
Berlis a señala cu awo AVP ta haci manera nan ta worry, pero nunca nan a worry!
