Parlamentario Marco Berlis (MEP)
ORANJESTAD (AAN): Recientemente Mike Eman a sali bai rumbo pa Hulanda despues di hopi aña pa bay trata na score politicamente como un politico di Aruba. Pretendiendo cu e tin e solucion pa tur cos, Mike Eman ta lubida cu e la maneha pais Aruba y hiba nos tur na bancarota. E show di campaña pa resucita un partido kibra y golpia pa celebra corupcion, maltrata y ofende candidatonan niun hende hamas ta bay lubida. Mike Eman su legado lo siña e futuro generacion cu mientras e tabata lider di AVP den oposicion, e la causa e exodo di 3 candidato, di cual dos Parlamentario cu tabata gosa di un number halto riba su lista politico.
Bishita na mr. Piet Hein Donner na Hulanda
Den su afan pa trata na impresiona pueblo Arubiano, Mike Eman a traha un lista di reunionnan cu figuranan di influencia na Hulanda. Sinembargo esaki no a Sali’e bon manera cu e la pensa! Despues di e prome bishita caba nos por a wak mr. Piet Hein Donner, minister di Estado pa Hulanda y hurista celebra, a expresa su opinion riba e idea di Mike Eman pa bin cu un Sociaal Cultureel Planbureau (SPC) aki na Aruba. Sr. Donner a bisa lo siguiente den un video:
“E idea ta bon, pero e mester sa con pa aplica esaki pa un isla asina chikito manera Aruba, pasobra e gastonan pa un isla, pa un instituto manera SCP, ta demasiado halto. Bo mester di masha hopi expertonan pa SCP cu ta miho pa wak con pa combina otro institutonan pa purba haci e trabao”. Den otro palabra sr.Donners a bisa Mike Eman cu su plan ta irealistico. Pero Mike Eman ta conoci pa derocha placa, redobla debe y pusha e debe pa otro gobiernonan paga despues. Na final ta pueblo tin di pag’e toch, manera e mes a grita y a declara den Parlamento di Aruba.
Coriendo campaña pa drecha imagen kibra di AVP
E prome bishita di Mike Eman na sr. Donner, minister di Estado pa Hulanda, tabata e definicion di henter Mike su biahe: “irealistico y mucho caro.” Nada straño si, pasobra ta di Mike Eman bo ta papiando. E mesun Mike Eman cu ta gritando cu mester baha gasto awor ta buscando manera di aumenta e gasto di pais Aruba si e drenta gobierno! Asina mes Mike den su desesperacion ta sigui core rond Hulanda pa saca potretnan cu politiconan Hulandes cu no por tum’e mas na serio.
Asina Mike Eman ta traha bunita storia riba website di AVP pa trata na convence pueblo cu e tin un solucion. Promoviendo SCP y un bon comun basa riba promesanan irealistico, cu gastonan impagabel ta e solucion di su Bon Comun? No pueblo, loke Mike Eman tin ta otro idea cu ta bay costa pueblo un megadebe 2.0 sin cu e tin un solucion concreto. Mike Eman no ta gusta rekensom, no ta gusta traha cu data pero si cu debe. Debe di klinker, asfalt y fiestanan cu a hipoteca nos pais y cu awo nos ta pagando Afl. 96.5 miyon pa aña na PPP so, Afl. 150 miyon extra na interes di megadebe sin paga e debe mes!
