Eduard Pieters di PPA:
ORANJESTAD (AAN): Durante un conferencia di prensa, Eduard Pieters, miembro activo di PPA, a presenta un topico basta fuerte relaciona cu e rechaso di un amienda vital pa nos futuro. E amienda, presenta pa PPA, tabata enfoca riba e presupuesto di TPEF (Tourist Product Enhancement Fund), unda a propone cambio crucial den legislacion, pa para of pospone construccion di casi 1000 camber hotelero.
Desafortunadamente y a pesar cu e propio minister di turismo, Wendrick Cicilia, cu ta responsabel pa e fondo aki y a reconoce e propuesta como uno "interesante", e parlamentarionan di coalicion AVP-FUTURO no a duna oportunidad pa evaluacion of dialogo profundo di e amienda presenta.
“No Mas Hotel” ta loke pueblo ta sclama: E amienda no tabata solamente un texto legal, sino un refleho di loke ta biba bou di nos pueblo, pa stop cu construccion descontrola. Riba un isla cu ta sinti e presion social y ambiental cada dia mas fuerte, ta iresponsabel pa sigui aproba proyecto pa mas hotel sin un vision duradero y sostenibel.
P’esey mes Eduard Pieters di fraccion di PPA a splica cu e e amienda aki tabata un proposicion pa pone un paro real den crecemento, cu ya a yega su limite.
Segun Pieters, e gobierno actual ta papia hopi di sostenibilidad. Pero sostenibilidad sin accion ta un ilusion. E amienda tabata e instrumento pa balansa economia, husticia social y proteccion ambiental. E amienda aki tabata un netamente un oportunidad pa pone e “sustainability fee” na trabou real, cu resultado real y asina nos hiba un bida bon sin compromete e posibilidadnan di nos futuro generacion.
Lobby y interes particular ta frustra cambio real: Loke ta remarcabel ta, cu den e ultimo reunion publico y den prensa, aparentemente gobierno a informa cu lo hiba combersacionnan cu e cadenanan mundial di hotel of cu esnan cu tin e permisonan necesario pa construi e 1000 camber extra.
“Pero e realidad ta cu un empresario kier haci negoshi cu e permiso cu el a haya den pasado. Nan no lo pensa cu nan curason y tene cuenta cu e un speech elocuente of sentimento di un of mas minister. Nan djis kier haci negoshi y ta p’esey nan a pidi dicho permisonan pa traha placa,” Eduard a subraya.
Fraccion di PPA ta sigui firme den su vision: un Aruba pa tur su ciudadano, basa riba un futuro cu calidad di bida, naturaleza protegi y un turismo cu ta sirbi e pueblo y no solamente e saconan di algun comerciante. “Nos no ta den gobierno, pero nos lo sigui lucha,” segun Pieters. “Sostenibilidad real ta un deber, no un slogan.”
Finalmente Eduard Pieters di fraccion di PPA ta invita tur fraccion pa pone pueblo na prome lugar y pa bolbe na mesa pa dialoga riba e contenido di e amienda presenta. Ainda tin tempo pa traha e cambio cu Aruba realmente merece. “Nos ta na tempo ainda pa no crea un rabia, fobia, descriminacion y rechazo entre e localnan y e turista. No ban hunga, cu practicamente, e unico pilar di economia di Aruba. No ban hunga cu hustitcia social y pone un presion riba nos medio ambiente”, Eduard a finalisa bisando.
