Parlamentario Dangui Oduber:
ORANJESTAD (AAN): Sindicatonan a manda un carta dia 7 di mei 2026 pa Parlamento, caminda nan ta splica un biaha mas nan posicion y ta pidi Parlamento pa para e proceso di e Rijkswet Hofa.
E conseho di Raad van Advies, como e organo di consulta mas halto di nos isla, consistiendo di expertonan local cu conocimento profundo di ley y di e structura constitucional di Aruba, riba su mes ta ofrece un base solido y cu autoridad local pa tuma decision. Ademas, mester enfatisa cu e preocupacion principal no ta exclusivamente di naturaleza tecnico-huridico, pero den su esencia esaki ta mishi cu e structura fundamental di nos democracia parlamentario y e grado den cual Parlamento di Aruba, como e organo representativo di pueblo, por eherce su funcion constitucional.
Consecuentemente, Parlamento di Aruba no por, ni tampoco mester limita su mes na warda riba un conseho adicional externo, pero mester orienta su mes riba duna direccion propio na e trayecto constitucional. Den e contexto aki, sindicatonan ta desea di haya sa for di Parlamento di Aruba si e contenido di e conseho di Raad van Advies ta motibo pa reconsidera y cancela e proceso di e Ley di Consenso di Reino HOFA den su forma actual.
Aruba NO kier un rijkswet: Actualmente den Parlamento, 10 di e 21 parlamentarionan ta contra e Rijkswet; banda di esaki, 13 sindicato cu ta representa miles di miembro tambe ta contra, y mas di 12.000 persona a firma e peticion contra e Rijkswet. E ta obvio cu nos NO por papia cu tin consensus!
Gobierno no kier respeta e deseo di pueblo y, pa un 'sakito di placa' di 7.5 miyon Florin, nan ta bay destrui nos Status Aparte. Con Gobierno kier pa nos celebra 40 aña di Status Aparte, si despues di e cuater decadanan aki nan mes ta kita esaki for di nos pueblo? Esaki ta traicion.
CAft a caba di duna su conseho riba presupuesto 2026. Den e conseho, CAft ta señala cu e debe di pais Aruba (e debt-to-GDP) ta baha bou di 50% y lo yega na 47% na aña 2028. Desde inicio, ora a cuminsa e discusion riba e Rijkswet, e condicion di Gobierno di Hulanda tabata cu, pa tin finansa sostenibel y duradero, e debe di pais Aruba lo mester ta bou di 50%. Wel, Aruba a demostra cu nos mes por, y ya aki dos aña nos debe ta baha bou di e 50% aki.
E ora ey, naturalmente, nos mester puntra nos mes: kico ta e urgencia y e necesidad pa entrega nos autonomia financiero, si nos a demostra caba cu nos mes por?
Ta insolito pa pensa cu tin politiconan Arubiano, manera Gerlien Croes, Geoffrey Wever y Mike Eman, cu kier pa nos celebra cu nos ta biba den un pais liber, mientrastanto nan kier entrega nos libertad y bende nos pais pa un 'sakito di placa'. Ta mas insolito ainda pa pensa cu nan kier entrega nos finansa publico y nos autonomia financiero, siendo cu aki dos aña caba nos debe di pais lo baha bou di 50%!
Aruba tin supervision financiero caba ancra den e Landsverordening Aruba Financieel Toezicht (LAft); nos ta cumpliendo cu tur e normanan, nos ta pagando nos debenan cu Hulanda y ya caba nos debe a baha substancialmente despues di e pandemia. Mirando esaki, no tin ningun motibo valido ni ningun hustificacion pa acepta e Rijkswet Hofa.
Libertad di un pais ta algo Sagrado. Nos ta un pais liber desde aña 1986 y, danki na e libertad aki, nos pais por a prospera y progresa. Nos tin e libertad pa tuma nos propio decisionnan, e libertad pa vota den nos propio Parlamento y e libertad pa maneha nos fondonan segun nos mesun deseo. Tur esaki ta wordo kita for di nos cu e Rijkswet Hofa.
E pregunta principal ta keda: Di con Gobierno kier destrui nos Status Aparte?
