Rodney Solognier di SPA ta reacciona riba comentario di Minister Dowers
ORANJESTAD (AAN): Siman pasa diabierna a tuma luga un accion di welga di trahadonan di Departamento di Rijbewijs y sindicato SPA como muestra di nan disgusto di e situacion y condicion di edificio den cua nan ta trahando pa hopi aña. Di su banda, Minister Dowers a reacciona comienso di e siman aki indicando cu e ta na haltura di e situacion y cu el a duna instruccion of ordo pa cera e edificio y pa muda e departamento pa un otro edificio pero cu esaki no a pasa.
Señor Rodney Solognier di sindicato SPA, a reacciona riba e comentario aki di Minister Dowers indicando su comprension pa Korpschef kende a indica cu esaki no ta bay asina facil cu un solo ordo. El a agrega cu e ta na haltura cu den ultimo tempo e presupuesto di KPA no ta alcansa pa tur cos. Bisando esaki, el a expresa cu nan mester bay bek cerca e minister pa discuti e topico aki.
Segun e, pa realisa e mudamento di e departamento di rijbewijs pa un otro localidad, tin costo mara na dje. Y pa haci esaki, incluyendo e necesidadnan adecua pa e departamento funciona bon y entrega miho servicio, mester tin un extra presupuesto añadi na dje.
“Tur cos ta costa placa y tanten cu Korpspolitie no haya e presupuesto necesario y suficiente pa ehecuta e cambio aki, mi no ta wak un salida asina facil. Nos ta wak cu den realidad esaki lo no pasa den un, dos, tres y specialmente si Gobierno no aporta”, señor Solognier a expresa.
Mientras tanto el a remarca, cu e tin entendi cu ta preparando e edificio di Doc Opleiding pa asina e departamento di rijbewijs tambe muda eyden, y cu trabounan ta wordo haci pa haci e luga adecua pa mehora e servicio cu e departamento aki ta duna. Sinembargo, el a bisa, cu ainda e tin pendiente un combersacion cu Korpschef pa discuti e desaroyonan riba e asunto aki.
