Parlamentario Shailiny Tromp-Lee na 24ora (MEP):
ORANJESTAD (AAN): Awe mi a habri mi dia cu un rueda di prensa. Contrario na loke ta usual, mi tabatin e honor di ricibi "bishita" di 24ora. Un bishita sensacionalista buscando oxigeno pa mantene un noticia bibo na beneficio partidista. Un solo pregunta nan a bin cun’e: Kico ta mi opinion encuanto e sucedido di Ursell Arends cu e boter di cerbes etc, mirando cu na 2021 mi a haci pregunta na Gobierno over di ARA su miembro e tempo ey, sr. Nuboer, over su comportacion y iresponsabilidad.
Mi a termina mi contestacion na 24ora bisando cu no a toca ni Gobierno, ni Parlamento pa actua mirando cu e persona en cuestion mes a retira na 2021. Dus e mes a asumi su responsabilidad", Parlamentario Shailiny Tromp-Lee di (MEP) a expresa.
Pa loke ta trata e sucedido y comparacion ta lo siguiente. Na 2021 y si puntra mi awe, mi ta keda para pa e hecho cu na tur momento nos mester garantisa e integridad y bon nomber di ARA. Esaki mester keda manteni na halto. Na 2021 mi a reaccion a abase di loke a sali den prensa y riba rednan social. E tempo ey tabata keda indica cu e sucedido aki, caminda e Vice Presidente di ARA a keda hiba warda di polis pa mal comportacion causa di buracheria. Hasta a keda indica door di prensa cu no tawata e prome biaha cu algo similar a tuma lugar cu e mesun persona en cuestion aki.
Mirando e situacion delicado y sigur no apropia mi a dirigi preguntanan na Gobierno pa puntra con ta bay atende cu e caso aki. Mi a referi e tempo ey na e Codigo di Conducta di ARA di aña 2010, art. 6 inciso 2 sub d di Ordenansa di Controlaria General, cu ta trata retiro pa actuacion inapropia of haci muestra di malcomportacion.
Ta bon pa subraya e hecho cu e persona en cuestion ya na 2016 su integridad a keda trata pa un otro Fraccion di MEP e tempo ey pa e caso di Insel Air N.V., esta e falta di cumplimento cu obligacion fiscal, situacion di faillisiment di e compania y perdida di trabou door di trahadornan. E tempo ey e tabata CEO di e compania en cuestion y alabes miembro di ARA.
Finalisando mi a y ta keda subraya cu mi ta mantene e opinion cu un Vice Presidente di un Hoge College van Staat su responsabilidad y obligacion ta pa percura pa no atacha e bon nomber di ARA y mas cu tur cos e mester mantene e confiansa di pueblo na tur momento. Ta inaceptabel cu den un puesto clave asina ta malcomporta pa motibo di uzo excesivo di alcohol te cu mester intermediacion di polis!
Den e caso di Minister Ursell Arends sigur no ta trata di buracheria, tampoco tawata tin autoridad involucre y sigur no ta algo ripititivo. Minister Arends ta papia di un descuido y cu el a siña di esaki. Ami sigur ta subraya e hecho cu ora bo ta bebe no stuur y si bo ta stuur no bebe. No ta abo so bo ta pone na peliger, pero tur otro riba caminda.
