Parlamentario Endy Croes: Serefina den Jet Gerlien ta gaña atrobe
ORANJESTAD (AAN): Parlamentario Endy Croes a tuma nota di un expresion sin sentido di Serafina den Jet Gerlien Croes alrespecto e renobacion di GPT Stadion Dakota. Den un post riba su Facebook Gerlien a splica cu renobacion di dicho Stadion inicialmente tabata calcula na 2.5 miyon y actualmente a yega 7 miyon.
Gerlien nunca a traha un cas, tin 0 experencia y ta pesey ta papia spetakel
Parlamentario Endy Croes ta splica cu Serefina den Jet Gerlien nunca a traha un cas, no tin experencia y tampoco ainda tin un logro propio y no tin un ‘benul’ kiko un proyecto di e magnitud aki ta encera y ta pesey e ta papia bobedad asina. Serefina den Jet Gerlien Croes gara ta gaña akinan un biaha mas. Tristo pa un minister mester papia “coy kens” di e manera aki. Gerlien por busca mihor conseho promer cu e papia manera baca ta laga basha. E renobacion grandi aki facilmente lo alcansa 7.7 miyon florin. Gobierno finalmente a inverti rond 4.7 miyon mientras Lotto a inverti rond 3 miyon.
Renobacion GPT Stadion Dakota
Desde aña 2016 Stadion Dakota ta ‘afgekeurd’ pa weganan internacional y tur seleccion di futbol mester hunga nan ‘Home Games’ na Corsou of Tampa Florida. Esaki tabata e tristo realidad. Nos a haci un promesa cu deporte cu si nos haña un oportunidad di sirbi e pais aki entre otro lo renoba Stadion GPT Dakota. Alabes pa FIFA esaki ta un condicion y e ‘yabi’ pa AVB por yega na e fondonan di FIFA pa construi 7 cancha di yerbe y cantidad di mini futbol veld. Gabinete Wever Croes 2 a reserva inicialmente 3.5 miyon pa por a inicia cu e promer fase cual a sali rond 2.6 miyon florin. Esaki tabata pa basha (1) tribune banda di zuid abou, reconstrui esaki, drecha e VIP ariba completo incluyendo extra baño, renoba e hala unda antes COA ( CEMEDAR), SSA, Atletiek, tabata usa completo, renoba sala grandi ariba (sala 30), modernisa y renoba ambos kleedkamber completo cu airco, ful instalacion di coriente y tur otro airco nobo, renoba e entrada banda di pabou y oficinanan.
Si Gerlien tin tiki ‘benul’ den construccion hamas e por a papia un bobedad asina. Banda di esaki den e siguiente fasenan a renoba e luznan di Stadion pa por cumpli cu standard y exigencia di FIFA/CONCACAF cual tabata un proyecto sumamente grandi y hopi costoso riba su mes. Den otro fase a cambia e turf pa uno aproba y certifica pa FIFA cual a pasa tur test y ta acredita awor y ta un proyecto riba su mes di algo mas cu 1 miyon florin. Mester a renoba e atletiekbaan tanto e baan ( e top) cual ta di marca MONDO e mihor riba mercado actualmente y tambe mester a cambia ful e fundering ( e base) cual porcierto tin 4 diferente laag di asfalt pa e por wordo certifica. Atletiekbaan completo su so tin un inversion di algo mas cu 2 miyon eyden di cual rond 1 miyon na MONDO pa a baan y 1.2 miyon pa Wegenbouw haci e trabou di e ‘onderlaag’ na specificacion y exigencia di MONDO. A inverti den extra yerbe pa cover tur locual tabata santo antes den ful e stadion y cubri e entrada di kleedkamer pa veld.
A inverti den un Led Screen scoring board di 5 meter pa 5 meter pues masha grandi y bunita cu ta na Aruba desde fin di Maart 2025 cual ainda Gerlien no tin fin di laga instala. Asina por sigui menciona masha hopi trabounan cu a tuma lugar pa renoba un Stadion cu tin 73 aña. Pues imposibel pa un minister cu a ricibi tur documento y informacion di e proyecto por tribi di gaña pueblo di e manera aki.
Parlamentario Endy Croes ta termina bisando cu Deporte a sali gana, Nos atletanan di futbol y atletiek a sali gana cu e proyecto aki.
Croes ta haci apelacion na Serefina den Jet Gerlien pa stop di biaha y stop di yora y termina e tiki cu falta pa conclui e proyecto. Stadion GPT Dakota un Joya di proyecto.
