ORANJESTAD (AAN) – Recientemente, Partido RED Democratico a tene un conferencia di prensa den cual, entre otro, a hiba palabra, su lider Rudy Lampe.
Rudy Lampe a papia di e situacion di conflicto cu RED a hiba cu MEP como partner den gobierno, vooral cu Minister Presidente, ken a expresa cu “egoismo di RED y POR a causa e final di gobernacion”, pero cu awo MEP y RAIZ den coalicion ta goberna den armonia.
Lampe a bisa cu enberdad na Maart 2021 RED a bay Gobernador bise cu nan no tin confianza mas den prome minister, pasobra RED su buchi a yena pero pa egoismo di partido MEP.
Lampe ta cuestiona cu tres miembro di e coalicion di MEP, incluso un ex-minister (POR) ta den investigacion, pero esey no ta e caso pa loke ta RED, y ta referi na e anuncio di Minister Presidente tocante e “logro historico” di gobierno pa cu Lotto pa Deporte.
Segun Lampe, RED ta para pa placa pa deporte y nan ta sostene esaki, pero e ta depende di e hendenan cu ta bay ehecuta un acuerdo, y a referi na un rapport cu ta data di añanan 2008 y 2009 cual ta publico, cu ta señala un miembro di MEP, cu e tempo tabata director di Lotto pa un tempo masha cortico, cu a paga 5 miyon florin na su ruman, y e placa aki no a bay pa deporte.
Segun Lampe e tempo ey diez hende a wordo tuma den servicio na Lotto sin cu tabata tin vacante. E ta puntra ta kico ta bay pasa aworaki? Si por kere cu e placa genera pa Lotto ta bay pa deporte? E ta asegura cu e placa ey ta bay pa “family & friends”.
Lampe ta subraya cu e parti operacional ta locual a bin bek pa Aruba, y cu e compania di Canada ta full digitaliza, loke kiermen cu asumi e operacion pa Aruba, kiermen mas personal y mas promocion pues mas gastamento di placa. E kier wak si aki tres aña, realmente deporte ta bay haya mas cu loke e merece y e practica cu a tuma lugar, no bolbe sosode.
Pa mustra e diferencia entre partido RED y MEP, el a bisa cu RED si a traha pa interes general. El a pone como ehemplo e lesnan di agricultura cu RED a implementa cu colaboracion di Santa Rosa, unda varios cursista di SPO a haya diploma y a lanta nan Green House unda por studia den e ramo aki. Esaki ta un proyecto di RED cu tey y cu mester continua na EPB, etc.
El a toca tambe e tema di Werksternan, y a splica di con SKOA a hinca su mes den problema den Corte y Financiero, pa e simple hecho cu e mester paga e Werksternan segun Ley ta stipula y a refuta locual presidente di SIMAR y SEPPA a trece dilanti na e momentonan ey, ora nan a benta falta riba su persona, como minister di enseñanza e ora ey.
Aworaki SEPPA ta hibando SKOA den Corte despues cu SKOA a notifica nan den un reunion, cu nan mester paga e Werksternan conforme ley. Rudy Lampe a remarca cu RED a trece esaki dilanti hopi biaha!
