Presidente di Parlamento Marlon Sneek:
- Pregunta y contestanan ta wordo registra
ORANJESTAD (AAN) Señor Marlon Sneek, Presidente di Parlamento, a indica den entrevista cu Matutino DIARIO, cu Parlamento semper tin registracion, y por tuma nota cu den fin di e Aña Parlamentario, nan ta publica cuanto pregunta a wordo haci na cada Minister, y cuanto ta e preguntanan cu a haya contesta.
El a comenta cu den e reunion cu nan tabata tin cu e Huishoudelijke Commissie, nan a pone como periodo cu nan lo haya y considera aceptable pa ministernan contesta Parlamento bek, ta den tres siman. “Nos por bisa cu e contestanan ta drentando, pero na mesun momento cu ta hopi pregunta tin, sigur riba tres mil, y di Parlamento nos ta haci un monitoreo di e diferente preguntanan y contesta, y nos ta haci apelacion na e diferente ministernan pa nos por haya e contestanan ey, pasobra hopi bez e preguntanan ta, entre otro, pa prepara bo mes pa e siguiente pregunta of pa e presupuesto”, Marlon Sneek a bisa.
El a agrega cu siman pasa nan a atende cu preguntanan di e diferente parlamentarionan y di e diferente fraccionnan, riba e presupuesto di 2026, y e preguntanan a bay caba den direccion di gobierno pa nan duna contesta. “Manera cu e contestanan aki drenta, nos lo por yama e reunion publico riba loke ta presupuesto. Loke ta pendiente pa nos ainda ta, entre otro, e Landsverordening Instelling Ministeries y esey nos mester haya, pasobra e presupuesto 2026 ta papia di otro ministerionan, pasobra Gobierno a dicidi di mantene e ministerionan di e gobierno anterior pa loke ta e presupuesto 2025, pero pa 2026 si, tin otro formacion. E Landsverordening Instelling Ministeries mester yega Parlamento pa nos por atende cu eseynan”, Presidente di Parlamento a remarca.
El a menciona tambe cu e ultimo presupuesto supletorio tambe mester yega Parlamento pa por atende cu ne, y esey ta e leynan cu Parlamento tin pa traha riba dje na momento cu e contesta di e presupuesto drenta, pero tambe mester haci pregunta riba esnan cu el a menciona, tocante e begroting pa por trata tambe den e reunion publico.
“Asina nos por cera e aña 2025 manera e ley ta stipula cu e presupuesto mester ta cla prome cu 1 di Januari, p’asina ehecut’e corectamente”, Presidente di Parlamento señor Marlon Sneek a enfatiza.