Parlamentario Evelyn Wever-Croes:
ORANJESTAD (AAN): Den e conseho di Raad van State riba ley di Reino HOFA cu a ser publica dialuna madruga, Raad van State ta enfatisa e importancia di tin un exit-bepalling cu ta realistico. Segun Parlamentario Evelyn Wever-Croes, den su conseho, practicamente Raad van State ta conclui cu no tin un exit-bepaling di tal magnitud pasobra ta referi bek na e normanan cu IMF a propone.
“Manera MEP a bin ta bisa, IMF no a papia nunca di un exit-bepaling di 20 punto”, Parlamentario Wever-Croes a remarca. Segun el a splica, IMF a papia solamente di dos norma financiero. E primair saldo, cu ta kico ta e surplus cu mester tin y e debt anchor, cu ta kico ta e percentahe di e debe den GDP.
Parlamentario Wever-Croes a indica cu Raad van State ta uza e argumento di exit-bepaling den e sentido cu ora ta un consensus rijkswet, dos pais por yega na un palabracion basa riba cu boluntariamente nan ta drenta den e acuerdo.
“Esaki Raad van State ta pone hopi enfasis na dje, cu den e ley di Reino HOFA, Gobierno di Aruba, AVP Futuro a yega na un acuerdo boluntario cu Gobierno di Hulanda pa drenta aden”, Wever-Croes a indica.
Pa e motibo aki, el a enfatisa, nan a aproba e ley den Conseho di Minister di Reino na maart ultimo. Pero, den su conseho, Raad van State ta enfatisa cu Aruba no mester solamente drenta na un forma boluntario pero ora di sali tambe Aruba mester sali na un forma boluntario.
“Den e caso aki, mirando e exit-bepaling y principalmente mirando cu no ta Aruba tin e ultimo palabra ora di sali y mester pidi Hulanda permiso ora di sali, no por papia cu tin consensus manera cu ley ta exigi”, Wever-Croes a enfatisa.
E parlamentario a finalisa bisando cu di parti di MEP ta spera cu Gobierno AVP Futuro realisa cu e situacion manera cu nos tin e aworaki y HOFA no ta bon pa Aruba. “Ohala cu esaki por ta un estimulo pa Gobierno di Aruba hiba e discusion caminda cu nos mester hib’e awo.
