Politica Hits: 116

Pueblo a perde confianza den economia y den su propio cartera

Politica Hits: 116
Pueblo a perde confianza den economia y den su propio cartera
Politica Hits: 116

Parlamentario Shailiny Tromp-Lee:

ORANJESTAD (AAN): Shailiny Tromp-Lee ta bati alarma tras di cifranan nobo di Banco Central: Pueblo a perde confianza den economia y den su propio cartera.

Mirando e ultimo informe di Banco Central di Aruba, publica recientemente, e panorama ta preocupante: confianza di consumidor a cay cu 3.7 punto pa yega na 92.7 den e prome trimester di 2026. Den lenguahe di Banco Central, cualkier cifra bou di 100 ta nifica pesimismo, y e caida aki ta un señal di alerta pa e desaroyo economico di nos pais. 

Cifranan alarmante: 

  • 68% di pueblo ta premira cu economia lo empeora den e proximo 6 luna. Na final di 2025 esaki tabata 36%.
  • 53% ta teme cu lo bira mas dificil pa haya trabou.
  • 35% ta anticipa cu nan situacion financiero personal lo empeora.
  • 41% ta kere cu posicion financiero di gobierno lo sigui bay atras.

Kico esaki ta nifica pa pueblo? 

  1. Placa no ta alcansa mas: 93% di famia a declara cu nan no por cumpra mesun tanto cu 6 luna pasa. Ademas, 96% ta teme cu prijsnan lo sigui subi den e proximo lunanan.
  2. Menos capacidad pa spaar: 46% di hogar ta spaar menos awor compara cu prome. Famianan tin menos reserva pa cualkier emergencia.
  3. Consumo ta frena: E Indice di Habito di Consumidor a baha cu 4.4 punto. Pueblo no tin confianza ni medionan pa gasta den comercio local, loke ta frena e dinamismo economico di Aruba.

Tromp-Lee: E informe aki no ta cifra friu. E ta refleho di un pueblo cu ta sinti cu no tin rumbo economico y cu su poder di compra no ta protegi. Banco Central a midi e sintimento den cada hogar na Aruba. E resultado ta claro: pueblo ta pesimista. 

“Manera mi a bin ta haci mediante preguntanan por escrito y como Presidente di Comision di Finansa, Organisacion Gubernamental, Cultura y Deporte, mi lo sigui enfatisa pa Gobierno duna mas atencion na e poder di compra cu ta bahando y e costo di bida cu ta aumentando. Pasobra si famia no por yega fin di luna, si hoben no tin speransa di trabou, y si negoshi ta teme futuro, e ora nos como Parlamento tin e deber di actua,” segun Tromp-Lee.