Parlamentario Evelyn Wever-Croes:
- E ta haya esaki un ‘falta di liderazgo’
ORANJESTAD (AAN): Den e reunion publico den Parlamento diamars ultimo, Parlamentario Evelyn Wever-Croes, den su disertacion, a elabora riba e crisis di Venezuela. Segun Parlamentario Wever-Croes, esaki no ta un crisis mas pero por wordo considera un guera dilanti nos awanan teritorial, mientras cu no tin informacion concreto di Gobierno di Aruba. El a compara esaki cu un avestruz cu ta sconde su cabes bou tera y warda e tempestad pasa.
Den tres ocasion, segun e parlamentario, Parlamento a yama Prome Minister Mike Eman pa tres Seniorenconvent na unda cu Prome Minister a asisti sin gana. Prome Minister a priminti cu e lo presenta cada pasa un siman, y no a cumpli. Tambe el a priminti cu Parlamento lo haya un presentacion di CMO pero no ta duna CMO autorisacion pa duna e presentacion aki.
Segun Parlamentario Wever-Croes, Prome Minister Eman ta fayando pueblo riba e tema aki. Un lider di berdad, el a bisa, no ta mir’e den tempo di bonanza so, sino den tempo di crisis. Prome Minister tin nos pais na werki pa falta di liderazgo, mescos cu e tin su gobierno di coalicion pa falta di liderazgo.
E falta di liderazgo aki, e falta di comunicacion transparente cu pueblo y duna informacion cla, ta crea un bashi y ta duna luga na informacion falso. Falta di informacion oficial aki ta causa cu hende ta cuminsa busca informacion, rumornan ta cuminsa, y pueblo ta asumi loke nan ta mira y scucha especialmente riba medianan social y ta yena e bashi. E consecuencia di esaki, segun e parlamentario, ta cu e ta kibra e sentimento di siguridad di ciudadanonan, ta duna mas preocupacion y tambe ta kibre e confianza cu pueblo mester tin den su gobierno.
“Silencio di señor Mike Eman no ta yuda trece trankilidad den nos comunidad, pero ta duna mas preocupacion y desconfianza. Nos pais merece liderazgo fuerte. Nos a conoce liderazgo fuerte durante pandemia. Y un biaha mas, nos pais merece miho”, Parlamentario Wever-Croes a enfatisa.
