ORANJESTAD (AAN): Ocho aña pasa, Jennifer Arends-Reyes a causa un impacto sumamente grandi den comunidad,
ricibiendo sosten masal di Pueblo den Eleccion Electoral 2013. Comunidad a duna Jennifer e confianza di drenta nos organo di mas halto, Parlamento. Durante 8 aña largo Jennifer a sa di traha na un manera sumamente profesional, manteniendo un nivel di positivismo y firmeza, logrando di e manera aki diferente proposicion y mocion na bienestar di Aruba y sumamente activo den diferente plataforma cu ta concerni desaroyo economico pa nos pais Aruba.
Progreso y Formacion: Segun Parlamentaria Arends-Reyes, Progreso general di nos economia ta un punto di prioridad pa asina sigura continuacion sostenible den tur e areanan cu ta na final di dia e weso di lomba di nos poder di compra, sea e ta e producto Aruba, stimulacion di companianan chikito y mediano of introduccion di industrianan nobo cu lo crea su ‘spin-off’pa Aruba su desaroyo economico.
Ta di remarca cu progreso general di nos economia, ta bay man den man cu formacion di un comunidad inteligente y capaz. No solamente mester pone enfasis riba ideologianan a corto plaso, pero mester sigui inverti den e fundeshi mas importante di un pais cu ta su Enseñanza. Ta aki ta unda cu nos futuro lo worde forma, e formacion aki ta depende di nos esfuerzo y inversionnan di awo pa cu termino largo.
Determina cu Firmesa: ‘Traha pa nos Pueblo ta un trabao sumamente duro y exigente. Pero danki na mi experiencia y mi determinacion mi ta sintimi capacita pa tuma cualkier reto cu ta pa bienestar di nos comunidad,’ Jennifer ta sigura. Determina cu Firmesa ta dos punto cu Jennifer tin hopi na serio. Durante su trayectoria como Parlamentaria, Jennifer a keda al tanto di desaroyonan como tambe den su area di experticio cu ta Enseñanza y Turismo.
‘Prome cu politica, Mi a traha como docente pa 10 aña, guiando hobennan den nan desaroyo bo ta biba di cerca kico ta motiva no solamente e hoben pero tambe kico realmente nos docentenan tin mester pa por eherce nan profesion na e mihor manera posibel,’ di acuerdo cu Señora Arends-Reyes. Tecnologia den Enseñanza lo ta di berdad un avance, pero ta un parti chikito di cambionan structural cu realmente mester sigui worde implementa.
Contacto cu Pueblo: Durante 8 aña largo, Jennifer a keda hopi cerca di Pueblo, y a mantene semper contacto cu nos digno hendenan pa scucha nan deseonan pa un mihor Aruba. Esaki semper tabata e base di motivacion di Jennifer pa continua cu su dedicacion pa nos Aruba. Manteniendo un relacion estrecho cu pueblo, Jennifer ta bishitando varios hogar hunto cu su Team, pa asina pa pidi sosten y alavez haya opinion y pensamentonan di nos digno pueblo.
‘Nos hendenan ta aprecia nos dedicacion y ta pidi pa nos continua cu nos trabaonan’, ta algun di e reaccionnan positivo cu ta worde ricibi. Ideanan y necesidadnan ta worde scucha y sigur ta e empuhe pa contenido di continuacion di trabaonan di Jennifer Arends-Reyes como politico y candidato sumamente fuerte riba e lista di AVP, 11 T'esun.
