Parlamentario Eduard Pieters (PPA) na Den Haag:
ORANJESTAD (AAN): Den su prome dia di e reunionnan oficial na Den Haag, parlamentario Eduard Pieters di fraccion di PPA a vocifera un mensahe cla y sin ambiguedad: Aruba no mester di Rijkswet HOFA y no lo acepta e debilitacion di su Status Aparte.
Durante un encuentro clave cu Don Ceder di ChristenUnie, PPA a presenta su ‘position paper’, exponiendo no solamente e riesgo politico di HOFA, pero tambe su trasfondo: un proceso cu, segun Pieters, ta pusha pa mas di 10 aña door di e ambtenaren na Den Haag, cu e solo meta pa debilita autonomia di Aruba.
HOFA- No ta coincidencia, sino un proceso di aña: Segun Pieters, e discusion di HOFA no a cuminsa awe. “Tin mas di 10 aña ya tabatin intento pa introduci cualkier instrumento, cu ta limita nos autonomia,” el a splica.
Despues di COVID, e presion a intensifica. Y segun PPA, a uza e debe di pandemia como instrumento di presion y manipulacion politico. “Esaki no ta solamente supervision financiero! Esaki ta influencia riba nos soberania,” Pieters a enfatisa.
Cambio di posicion- politica sin principio: Den e reunion, PPA a pone tambe un punto politico sensitivo: e cambio drastico di posicion di e partidonan na Aruba. Henter Aruba sa cu AVP fuertemente a indica cu nan ta contra Rijkswet, pero desde formacion di gobierno, a bolter y bira pro Rijkswet. Partido MEP tabata e gobierno cu a firma e famoso ‘bestuurlijk akkoord’ y awe ta contra HOFA.
“Pues e conclusion ta preocupante,” Pieters a bisa. “Politica no mester wordo guia pa conveniencia, pero pa principio.” Segun PPA, esaki ta mustra con presion externo y dinamica di coalicion ta distorsiona e decisionnan cu ta afecta futuro di pais.
Aruba no ta un problema financiero mas: Un di e puntonan mas fuerte cu PPA a trece dilanti ta cu Aruba no ta un riesgo financiero, ya cu e schuldquote a baha di 117% te 70%, economia ta mustra crecemento y nos a registra surplus.
“Si nos ta haciendo bon, pakico insisti riba un Rijkswet?” Pieters a cuestiona. Esaki tabata e pregunta central den e dialogo cu Don Ceder.
PPA NO ta contra supervision. Al contrario. “Nos ta kere den responsabilidad financiero,” Pieters a aclara. “Pero e supervision mester ta ancra den nos propio Staatsregeling.” Solucion?
Crea un begrotingskamer, cu control fuerte pero local y percura pa transparencia sin perde autonomia. Esaki ta duna Hulanda siguridad y garantia, sin sacrifica e posicion unico di Aruba den Reino.
Interes- un trato inhusto: Otro punto crucial tabata e interes riba e lening di COVID. Aruba ta paga te 6.9%, mientras otro pais den Reino ta paga alrededor di 3.2%–3.4%. PPA a propone un solucion pragmatico: (*) Baha e rente/interes na nivel comparabel of si ta mantene e 6.9% uza e diferencia (3.4-6.9= 3.5%) pa crea un fondo di inversion pa Aruba.
“Nos ta dispuesto pa paga, pero no pa acepta un trato inhusto,” Pieters a declara.
Un di e mensahenan mas fuerte cu a sali for di e reunion ta e gran necesidad di union. Don Ceder mes a subraya e importancia pa Aruba presenta union. “Nos mester bay Den Haag no como partidonan separa, pero como un solo pueblo,” Pieters a enfatisa.
Aruba mester para firme: E prome dia na Den Haag a confirma un cos: E lucha pa proteha Status Aparte ta mas relevante cu nunca. PPA ta mandando y vociferando un mensahe directo: no na HOFA, no na debilitacion di autonomia y si na responsabilidad, pero bou di nos propio leynan. “Aruba no ta contra cooperacion ni supervision financiero,” Pieters a conclui. “Pero cooperacion no por nifica cu nos ta entrega un lucha historico di nos autodeterminacion.”
