ORANJESTAD (AAN) – Eduard Pieters di PPA ta boga pa den futuro Aruba por lanta un instituto linguistico cu lo bay percura pa planificacion di status di papiamento.
E institulo lo mester encarga su mes pa mehora, duna balor e papiamento y kita e medio falso di papia nos idioma.
“Pasobra, ainda por ta, tin hende ta pensa cu e ta un dialecto. Of cu kizas si ainda bo ta papia Papiamento, bo no ta un hende studia. E berguenza falso aki nos mester elimin’e. Un Instituto Linguistico por yuda nos haci esaki. Banda di esaki tambe, un Instituto Linguistico ta bay percura pa traha riba Status di Papiamento.Y tambe e parti di distribucion di Papiamento.
Con nos ta hiba Papiamento den tur skina, no solamente na scolnan pero tambe na cualkier skina aki, pa nos por balor’e miho, tanto pa e Arubiano mes pa nan por sinti orguyoso di Papiamento, pero tambe pa e personanan cu ta bin biba na Aruba.
Y tambe, pa imagen y prestigio. Pa tur esaki un Instituto por regula e desaroyo optimal di Papiamento.
Y aworaki, lamentablemente, no ta e caso. Pero nos como fraccion di PPA, cu nos ta un partido patriotico, nos ta defende loke ta di nos, nos lo sigui percura y sigui lucha pa tin un miho Status di Papiamento, manera dos aña pasa a logra”, Pieters di PPA a remarca.
