Parlamentario Marco Berlis cu mas contesta na Señora Gunn di MAS
ORANJESTAD (AAN): Siman pasa Señora Gunn di fraccion di MAS a reacciona riba un di e 4 articulonan cu mi a publica tocante RWZI. Lamentablemente su reaccionnan riba e articulonan no tin nada di haber cu hechos, cifras, ni evidencianan cu mi a trece dilanti, pero si a tuma e tempo pa desacredita mi persona sin ningun base.
Sra Gunn: “Postura anti-Aruba ta ora un Parlamentario vota pro Eagle LNG sin cu el a dispone di informacion concreto”
Contrario na sra Gunn, mi a tuma tur oportunidad pa educa mi mes ampliamente riba LNG gas, e trendnan mundial, nos a bay maintanan di informacion di expertonan riba e materia unda señora Gunn tabata invita y NO a asisti, nos a conoce e vision di WEB Aruba NV unda señora Gunn tabata invita y a scoge pa NO asisti, nos a haya oportunidad pa haci pregunta na professionalnan unda señora Gunn a scoge pa NO haci uzo di e oportunidad, y asina Señora Gunn, asina ma bin n’e conclusion cu esaki ta un proyecto positivo pa Aruba. Naturalmente ora bo NO KIER ta presente na sesionnan di informacion cu expertonan, NO KIER lansa preguntanan ora cu por, bo NO ta dispone di informacion concreto. Bo kier pinta un paisahe negativo riba tur cos y tene man cu AVP, cualnan nunca bo a cuestiona. Un tip: Puntra AVP pakico nan kier a bin cu e mesun Proyecto, traha di e mesun forma y di con awor tur cos ta malo.
Sra Gunn: “Coalicion den su totalidad a vota contra e mocion di MAS y Accion21 pa efectua e ley di integridad cada pasa un aña”.
Señora Gunn corda menciona cu mi a vota pro e Ley di Integridad cu ta encera screening. Mañan MAS kier pa screening tuma lugar cada 6 luna of cada 3 luna. Screening no ta algo 1-2-3, e ta tuma su tempo si bo kier pa e worde bon ehecuta. Esaki no ta un wega señora Gunn. Un pais mester worde maneha. Pero esaki ta e modus operandi, busca cualkier splinter den wowo di hende mientras di boso mes tin un balki. No hunga politica cu bienestar di pais Aruba. Bo a vota contra un mocion cu ta ofrece solucion y stabilidad pa e problema di RWZI.
Sra Gunn: “Postura anti-Aruba ta ora e parlamentario no ta pone den ehecucion e Trias Politica y no ta ehecuta e rol primordial di controla gobierno”.
Sra Gunn, ami hamas lo hunga e politica contra interes di Aruba. Ora algo ta bon mi lo vota pro. Prome cos cu mi ta haci ta asisti na TUR reunion cu expertonan pa mi tende pa mi mes kico ta informacion, mi ta investiga, mi ta haci pregunta ora mi haya e oportunidad, mi ta lesa tur rapport y document concerni diligentemente. Di e forma aki ami ta haci mi trabao di control, door di informa mi mes debidamente door di expertonan. Dia cu algo ta malo tin sigur cu mi lo vota contra. Sinembargo, bo persona no ta asisti, y bo ta hiba un postura di ‘mi ta den oposicion pues NADA ta bon pa mi’. Esaki a keda demostra claramente durante reunion di RWZI. Pesey boso a vota CONTRA! Boso deseo votando contra di mantencion y un planta nobo kiermen cu boso kier pe planta rementa pe causa disaster pa nos pais, pa di berdad nos awanan bira insigur y pa nan contamina. Anto ainda boso no ta anti-Aruba?
Documentando mi mes, asistiendo na tur sesion di informacion y hacienda pregunta na expertonan mi ta eherce mi trabao mane debe ser. Asina ami ta practica locual mi ta predica!
