ORANJESTAD (AAN): Loke a cuminsa como un reunion cu poco urgencia tocante un posibel desviacion di ley den compatibilidad den un destaho publico,
a termina den un confrontacion politico hopi mas grandi riba e estado real di enseñansa na Aruba. Durante e reunion publico, parlamentario Eduard Pieters di fraccion di PPA a expresa su preocupacionnan serio tocante e falta di transparencia, falta di responsabilidad politico y e atraso alarmante di e leynan fundamental pa proteha calidad di enseñansa na Aruba.
No por sigui goberna via Facebook
Segun Pieters, e reunion tabata sumamente necesario, paso tin sospecha cu minister di enseñansa a desvia for di e cuadro huridico di Ley di Compatibilidad, den e proceso di material educativo na Hulandes y Papiamento. Como profesional den veld di enseñansa y ex empleado di Departamento di Enseñansa, Pieters a bisa cu e ta compronde e dificultad pa haya e ofertantenan specialisa den produccion di material educativo pa Papiamento of Hulandes como idioma stranhero. Pero precisamente door cu e mercado ta limita, gobierno mester ta extra transparente. “Ora bo no tin hopi ‘aanbieders’, bo tin cu mustra claramente cu bo a haci tur esfuerzo posibel, pa sigui e proseso corecto. Parlamento y pueblo merece mira e pruebanan. Pero esey no a pasa,” Pieters a declara.
El a critica cu minister ta evita Parlamento, no ta contesta e preguntanan oficial manda for di aña pasa y ta prefera comunica via Facebook, en bes di duna cara y responsabilisa su maneho den Parlamento. “Goberna no ta djis pone post riba social media y asumi cu nos como Parlamentario ta lesa esaki. Nos tin proceso bon delinea con e forma di traha mester ta. Goberna kiermen duna cuenta y responsabilisa bo mes como minister na Parlamento, sin importa si ta coalicion of oposicion,” el a enfatisa.
8 aña despues, e leynan crucial ainda ta “desapareci”
Pieters tambe a uza e reunion pa confronta minister cu un problema structural cu, segun Pieters, ta frenando futuro di Aruba: e ausencia di un cuadro legal moderno pa ‘beroepsonderwijs’. Durante su bishita reciente na EPB Hato, docente y directiva a cuestiona unda e Landsverordening Beroepsonderwijs a keda. Pieters a expresa, cu e ta inaceptabel cu despues di mas cu 20 aña di existencia di EPI y EPB, Aruba ainda no tin un ley specifico pa regula y garantisa calidad di enseñansa den ‘beroepsonderwijs’.
“Bo no por compara beroepsonderwijs cu voortgezetonderwijs; MAVO, HAVO of VWO. Ta dos mundo completamente diferente,” Pieters a bisa. “Y ainda nos ta obliga nan tambe pa funciona bou di ley antiguo cu no ta ni relevante mas.”
Segun Pieters, e ley aki a cuminsa su proceso rond di 2018, pero ocho aña despues Parlamento ainda no sa unda e proceso ta pega. E mesun incertidumbre ta reina rond di e otro leynan esencial manera:
LV Onderwijs Toezicht
LV Primair Onderwijs
Nos ta inverti den tablets, pero ley ta keda den siglo pasa
Un di e puntonan mas duro cu Pieters a trece dilanti, tabata e contradiccion entre realidad di e scolnan y realidad den ley. Segun Pieters, e scolnan ta haci inversionnan grandi den material digital, maestronan ta sigui curso di digitalisacion y tecnologia ta bira parti di enseñansa diario. Sinembargo, nos leynan educativo ainda no refleha e cambio aki y hasta tin articulo cu ta stroba innovacion. “Esaki ta loke ta tene Aruba atras,” Pieters a declara. “No por ta cu mundo ta move dilanti y nos sistema legal ta keda pega den pasado.”
Enseñansa no ta gana voto, pero ta defini futuro di un pais
Pa Pieters, e problema principal ta politico. Segun Pieters, hopi gobierno no kier inverti seriamente den enseñansa, paso resultado no ta visibel inmediatamente. “Bo no ta gana voto cu enseñansa, manera cu bo ta gana cu asfalt of edificio,” el a bisa. “Pero despues di 10 of 20 aña, e calidad di un pueblo ta wordo dicidi precisamente door di e decisionnan educativo cu bo a tuma awe.”
PPA ta insisti cu Aruba no por sigui trata enseñansa como un asunto secundario, mientras e sistema legal educativo ta keda paralisa. “Si nos no modernisa nos enseñansa awe, nos ta condena futuro di nos muchanan,” Pieters a conclui.
