Ursell Arends di Partido RAIZ
ORANJESTAD (AAN): Simbolicamente para net pafo di e porta di cura di Stadhuis na Playa, Dialuna merdia e dos Ministronan di Partido RAIZ, hunto cu parlamentario Raymond Kamperveen a tene un conferencia di prensa pa en corto splica cu aunke nan no ta di acuerdo cu gobierno a hiba e caso di igualdad pa cassatie, toch nan ta respeta esey como cu Aruba ta den un estado democratico.
Ministro Ursell Arends papiando dilanti microfono den Schoolstraat na Playa, a splica cu nan a dicidi na duna nan banda di e caso aki, despues di a nota varios publicacion dirigi riba nan.
Asina el a duna pueblo e informacion di e decision cu plataforma RAIZ a tuma den asunto di derecho di igualdad, e tema di matrimonio di mesun sexo, pa asina comunidad sa kico ta e ruta cu RAIZ a dicidi pa cana.
“Idealmente nos plataforma y sigur nos como Ministronan di RAIZ no lo a desea pa Gobierno bay den cassatie, pero nos ta respet democracia y esaki ta loke a tuma lugar. Nos ta en espera pa e debate publico por wordo hiba den Parlamento di Aruba y asina e ley por wordo aproba, caminda ta garantiza derecho di igualdad y mas cu tur cos, inclusion.”
Segun Arends, e tema aki envez di crea union den comunidad, ta mirando cu e ta creando hopi division y netamente loke nos plataforma ta para pe ta un di e puntonan principal di nos plataforma ta inclusion, y netamente esaki ta loke nos kier logra ora ta trata e tema aki.
“Hopi hende ta lubida ora nos ta papia di igualdad y matrimonio di mesun sexo, loke nos ta papia ta di ser humano, y e ser humano aki mester wordo garantiza cu nan por wordo respeta den e comunidad aki, y esey ta loke RAIZ ta boga pe, esey ta e ruta cu nos a cana pa nos por garantiza cu den Parlamento e debate publico aki por wordo hiba y unavez e ley worde trata y aproba, esey lo garantiza e igualdad, e inclusion, cu e comunidad LGBTQ+ pa decadanan ta boga pe na Aruba, y esaki ta e ruta cu nos kier bay conhuntamente cu mi coleganan, pa awe elabora riba esaki,” Ministro Ursell Arends a bisa.
Partido RAIZ ta mira e ley como un instrumento, pero ta mira tambe tur e otro aspectonan cu mester wordo agrega na esaki, y cu mester tuma lugar pa asina e grupo aki di comunidad tambe por garantiza e inclusion necesario.
Segun Arends, ora e menciona esey, e ta papiando di hobennan cu kizas den nan propio hogar no ta wordo respeta pa e decision cu nan ta tuma pa kende nan kier ta den bida.
“Desde inicio di e plataforma aki, nos a para pa derecho di igualdad y inclusion, y no ta importa di unda bo ta bin, no ta importa bo color di cuero, no ta importa tampoco e religion cu bo ta escoge, y mucho menos ken abo ta desea di stima... bo mester wordo garantiza e derecho di igualdad riba nos isla y esey ta loke RAIZ lo sigui boga pe, lo sigui para pe.”
El a bisa cu Partido RAIZ no a dobla na ningun momento, pasobra nan ta sigui para firme pa nan principionan y lo garantiza igualdad pa cada ciudadano na Aruba.
