Lider di partido MEP sra Evelyn Wever-Croes
ORANJESTAD (AAN): Dialuna mainta, durante conferencia di prensa, lider di partido Movimento Electoral di Pueblo (MEP), sra. Evelyn Wever-Croes a tuma e oportunidad pa elabora riba e actividad di partido cu lo tuma lugar dia 30 di October na cede di MEP. E slogan di e evento aki lo ta; “Un Aruba Stabiel cu MEP”.
Durante e evento lo tin varios actividad cuminsando cu un acto cultural y un show hopi bunita. Lo tin tambe un Expo hopi interesante di e 3 lidernan di partido. Pa cu esaki lider di partido ta extende un invitacion na pueblo en general pero tambe na e scolnan pa pasa y experiencia esaki. Pa famianan cu mucha chikito, lo bay tin un “kids corner” cu personanan encarga pa entretene e muchanan mientras cu e mayornan por goza di e expo.
Presente tambe lo tey e hala hubenil di partido MEP, HOT cu actualmente ta buscando miembronan nobo. Tur e hobennan cu ta interesa, por pasa e dia aki aplica pa ta un miembro pa asina por amplia e famia di HOT.
Mirando cu MEP ta un partido cu no ta depende riba comercio pa bay campaña electoral, lo tin actividadnan pa recauda fondo. Un biaha mas partido MEP ta organisa un rifa di apenas 5 Florin pa ticket na unda lo saca diferente premio di cual e maximo ta 10 mil Florin. Ganadornan di e rifa aki tambe lo wordo saca durante e anochi aki. Pa tur esnan cu ta interesa, ainda tin buki disponibel.
Den un otro esfuerso pa recauda fondo, partido MEP lo tin na benta pechinan di “Un Aruba stabiel cu MEP” pa solamente 20 Florin. E petchi aki lo combina perfecto cu e t-shirt di “Un Aruba Stabiel cu MEP” cu lo ta completamente gratis. Petchi y t-shirtnan lo ta disponibel na cede durante e gran evento di partido dia 30 di October.
Riba e dia aki tambe lo bay tin e congreso di MEP cu ta un formalidad cu partido MEP ta cumpli cu ne cada pasa tanto tempo. Durante e congreso lo presenta e relatonan anual, e fundacion nobo cu ta e fundacion Nelson Orlando Oduber, miembronan di directiva y e hala femenino di MEP cu ta Forsa Femenino Grace, cu recientemente tambe a cambia di directiva y presidente, tambe lo tin e parti di reeleccion di lider.
Lo cera e anochi den un ambiente festivo cu e bandanan Delicious y Tsunami. Bar lo ta bon surti bou encargo di Fundacion formacion politico Nelson Orlando Oduber cu ta recauda fondo pa nan actividadnan. E fundacion aki ta esun cu ta yuda forma politiconan nobo. Cushina tambe lo ta bon surti y esaki ta den man di Forsa Femenino Grace cu tambe ta recauda fondo pa nan actividadnan.
Lider di partido MEP ta extende un invitacion cordial na tur nos votadornan, sostenedornan, tur lider di bario y Aruba en general pa pasa disfruta den famia, diadomingo dia 30 di October di 4 pm na Cede di MEP.
