ORANJESTAD (AAN); Tanto Diaranson como tambe Diahuebs, a tuma nota cu varios persona cu abiertamente ta indica cu nan tin un favoritismo politico,
toch a dicidi na duna un man y bay firma pa Partido HTC como sosten di nan candidatonan.
Diaranson anochi, Partido HTC tabatin en total 323 firma cu nan a logra den 3 dia di tempo. Esaki ta igual na un promedio di 108 firma pa dia. E statistica ta mustra cu nan tin chens di yena e lista den 5 dia di tempo.
Diahuebs por a mira tanto e lider di HTC, esta Gilbert Webb, como tambe e dama hoben Latoyer Briggs dilanti e dependance di Censo na Lloyd G. Smith Boulevard, y Sr. Celestijn cu borchi den nan man ta indica interesadonan pa pasa y deposita nan firma.
Riba Diahuebs merdia, HTC ya tabata bayendo pa 419 firma. Pero poco pasa di 4:15 pm, e informe a drenta cu nan a logra yega na 587 firma.
Pues riba un solo dia nan a haya 264 firma extra pa a yega e suma total.
Observadornan ta mira cu varios Partido Politico grandi mes tabata sugeri nan siguidornan bay firma pa e partidonan chikito, como cu den eleccion di 25 di Juni 2021, e votonan pa e partidonan chikito via e formula di matematica lo bira potencialmente den restzetels pa e otro partidonan.
