Gerlien Croes, lider Partido Futuro
*Despues lo sigui bay den e siguiente stapnan
ORANJESTAD (AAN): Lider di Partido Futuro, Gerlien Croes tabata riba agenda diamars mainta pa reuni cu Gobernador Alfonso Boekhoudt. El a indica cu nan ta contento con e proceso ta bayendo y con e ta mustra cu e ta bay encamina.
Croes a agrega cu nan ta wordo recorda riba e rol importante cu Partido Futuro tin den e proceso aki. Partido Futuro a presenta un alternativa di pensamento y programa pa e pais aki. A haci ahustenan necesario pa e bienestar di e comunidad.
El a bisa cu e programa di cada partido mester ta den alineacion cu locual ta e pensamento di Partido Futuro pa por yega na otro. Esaki ta loke aworaki ta bay wordo explora.
Como partido nan a cuminsa haci nan huiswerk caba di wak otro programanan. Pa locual ta partido AVP, nan no a haya e programa. Ta wak solamente 10 punto di prioridad. Ta wardando un contesta si partido AVP a presenta un programa cu por pasa door di dje pa wak kico ta e alineacionnan cu tin. "Esey ta e punto di mas importante (...) No ta bay pa ken ta e actornan cu ta ehecuta e trabao. E ta bay pa kico kier haci pa Aruba", a remarca.
Croes a expresa cu aworaki e partidonan ta partnernan igual pa sinta na mesa y esey lo ta decisivo. Si kier yega na otro tin cu sacrifica un ke otro, pero lo minimo mas posibel. "Esey ta nos punto di salida", el a bisa.
Pa loke ta PPA, el a indica cu PPA tin su asiento. Tin un situacion tambe den e partido cu tin cu tene cuenta cu ne.
Na e momentonan aki tin cu bay defini kico por y kico no por. Pueblo ta e prome yama. Ningun partido ta e prome yama. Pueblo a papia bon cla.
Ta prematuro pa papia di e actornan. E actornan aworaki ta e programanan ya cu mester por ta alinea cu un hende pa por explora e posibilidadnan pa un 'samenwerking', Croes a declara.
