Fraccion di MEP:
*Promesa falso di campaña
ORANJESTAD (AAN): Durante campaña electoral 2024, cu a termina 6 luna pasa Partido Futuro tabata e partido mas “nobo” y awor ta resulta, nan tabata tambe esun di mas tradicional y falso.
Dicon? Pasobra nan a haci un cantidad di promesa den campaña y apenas algun siman den gobernacion, ta kibrando TUR e promesanan. Mas serio ta e hecho cu e lider Gerlien Croes y e sublider Geoffrey Wever ta admiti cu tabata promesanan FALSO.
Laga nos recapitula apenas algun, y si nan tin e curashi di desmenti, nos lo sigui publica mas.
Promesa falso:
#1. Baha costo di bida: awor nan ta bisa cu costo di bida no a subi, no mester preocupa y nan no tin plan con pa baha costo di bida.
#2. Baha gasto di gobierno: nan a organisa un fiesta dia nan a huramenta, sin Mike de Meza, cu a costa Pueblo mas di 100 mil florin! Riba dje cu ta paga periodistanan, banda di tur esnan di e PR-team di gobierno.
#3. Stop biahamento innecesario: e prome cu a kibra e promesa aki tabata e lider Gerlien Croes cu a haci un snoepreisje pa Hulanda siendo cu reunion a wordo cancela. E no a reuni cu NINGUN politico y dentro di poco mester bolbe bay pa negocia cu Hulanda.
#4. Stop tumamento di hende politicamente liga: den e prome dos lunanan di gobernacion ya e gobierno a tuma casi 100 persona den servicio, hendenan pa gran mayoria, nombramento politico y pa contractnan exorbitante halto.
Esaki ta apenas 4 ehempel dicon partido Futuro ta FALSO, y nan no merece bo voto nunca mas.
