ORANJESTAD (AAN): Manera ta conoci, Schoolgeld di EPB a subi di 140 Florin te 1.600 Florin.
Gobierno no a acepta esey, y pa busca solucion a core check kico por haci, y si acaso por cambia e subsidio conoci como “normbedrag”.
A bin haya sa cu gobiernonan anterior tur manda placa pa scolnan via di e “normbedrag” cu cada tres aña mester haci un estudio riba dje, pa wak si tin inflacion, etc., y wak si tin cu ahusta esaki. E ultimo aña cu esaki a tuma lugar corectamente, tabata na 2009 bao di MEP, y na 2010 el a wordo ahusta, pero despues nunca mas te drentando 2021.
Danki na e estudio aki, a cambia e normbedrag. Pues e schoolgeld di EPB School no ta 1.600 Florin mas, pero Gobierno a logra bah’e back na 280 Florin.
Awor a bin haya sa, cu segun AVP e suma di 280 Florin aki ta hopi, y nan ta hasta yame “aumento barbaro”.
Pesey recien un comision di mayornan y alumnonan hopi preocupa a compaña un delegacion di AVP den expresa nan malcontento con “interes di un kliek ta bay dilanti di interes di educacion di nos muchanan”. Esey ta locual mayornan rabia a expresa dilanti di EPB school, relaciona cu e aumento barbaro di schoolgeld.
Hunto cu demas miembronan di Partido y mas ciudadano, cifranan a keda presenta con di un banda ta subi schoolgeld barbaramente y di otro banda ta keda e pregunta clave “Unda e 1.5 biyon extra di entrada di Gabinete Wever Croes a bay?”
Comienso di aña escolar nobo ta uno, no di aspiracion y animo, pero di preocupacion y dificultad, sigur pa e mayornan di schoolnan na Aruba. Lider di Partido di Pueblo Arubano, AVP, Mike Eman hunto cu otro miembronan di e partido a reuni cu nan pa brinda solidaridad pa e situacion cu e gobierno actual ta obliga nan di biba pa nan falta di maneho y vision. Specificamente Gabinete Wever-Croes I y II a keda sin evalua y ahusta e normbedrag cu cual ta subsidia enseñansa publico.
Ta e practica regular di un gobierno responsabel, manera cu esun di AVP tabata, pa cada tanto tempo evalua e normbedrag pa wak si e cifra ainda ta cubri e gastonan. Esaki ta algo cu sa sosode cada 5 a 10 aña. Despues di no a haci nan trabao, awo gobierno kier culpa e gabinete anterior. Esaki simplemente ta un excuus masha fofo, segun AVP.
Ta obvio cu si, desde cu MEP ta na mando, ta medida so a introduci, cu mester ahusta e normbedrag. Ta gobierno mes a percura pa prijs di tur cos subi y awo e consecuencia ta cu SKOA y otro fundacionnan mester di mas finanzas pa opera nan schoolnan, pero Gabinete Wever Croes ta tene e placa pa favorece “un kliek rond di e gobierno aki”. Mientrastanto e gobernantenan si ta drecha pa nan mes y esey ta e diferencia grandi entre nos y nan; pesey nos no ta mescos cu nan, segun AVP a indica.
Pa e motibo aki, Partidp AVP a manda dia 1 di augustus un carta pa alerta Prome Minister Evelyn Wever-Croes riba e problema cu nan ta creando pa miles di mayor. Gobierno sa masha bon cu mayoria famia di studiante di EPB ta humilde y den situacion hopi dificil cu simplemente no tin pa paga e aumentonan drastico di schoolgeld. Fuera di esey, tin maestronan rond di Aruba cu ta di nan mesun saco a paga pa drecha klas. Esaki ta e mesun docentenan cu tin 7 aña sin haya indexering pasobra Gabinete Wever-Croes y nan kliek tur e tempo aki a percura solamente pa nan mesun saco.
Na 2017 Gabinete Mike Eman II a laga atras un Aruba renoba, cu scolnan nobo, caretera nobo, cu ambtenaar cu ta haya indexering y ciudadano cu ta haya reparatietoeslag, entre otro. Den contraste, desde cu MEP a yega na mando, ta medida so a keda introduci na e punto cu 2017 tabata necesario 2.000 Florin pa luna pa un persona biba, mientras cu aworaki e suma ey a subi na 2.500, creando un deficit cu CBS a indica di ta 745 Florin. Esey ta e consecuencia di e gobernacion aki faboreciendo nan kliek y lagando pueblo cu costo bida halto cu ta creando pobreza y miseria.
Segun AVP, e gobierno aki a haya 1.5 biyon Florin extra compara cu gobierno di AVP. E lider politico ta puntra si nan a drecha un scol of un bario cu e placa ey? Loke nan a haci ta decora un trapi y verf e toren na Palm Beach. AVP a fia pa traha un Aruba cu awe ta para pa hopi mas di loke a fia. Kico MEP a haci cu e 1.5 biyon Florin? Unda e 1.5 biyon e placa aki a bay?
