Mike de Meza na Mike Eman:
ORANJESTAD (AAN): Un di e discursonan den Parlamento cu sigur a hala hopi atencion, tabata di parlamentario di AVP Mike de Meza.
Sr. De Meza a expresa su sentimento contra e ley di Reino. El’a recapitula e historia di e lucha pa Aruba ta baas den su mesun cas, te na yega na 1986 caminda cu Aruba a logra su autonomia. “Den e ley nos dilanti, nos ta acepta pa haci cambio den nos autonomia, y e problema cu ami tin ta cu nos ta bay tuma un decision pa bay cambia e autonomia cu nos tin. Pa mi ta algo inaceptable. E unico cu a hiba nos na e autonomia cu nos tin awe, ta e pueblo, y pues ta pueblo ta e unico cu por cambia esaki, por medio di un mandato”.
Pesey parlamentario Mike de Meza ta boga pa un referendum. “Si acepta e cambio di ley aki, ta pasa un autoridad pa Conseho di Ministro di Reino, y eyden nos no tin nada di bisa. Con e ora nos por pone autonomia di nos pais den nan man, sin cu a scucha pueblo prome. E cos aki ta mas grandi cu e partidonan politico, esaki ta mas grandi cu nos tur. Aki nos ta papia di un derecho di nos pueblo y ta pueblo mester duna nos un mandato”.
Mike de Meza a cuestiona su propio partido cu a bay eleccion contra e rijkswet, y awor diripiente a bolter y ta na fabor, sin scucha pueblo. Mas aun, Mike de Meza a subraya cu tanto MEP como AVP, cu hunto ta representa 85% di e votadornan, tabata CONTRA e ley di reino. El’a cuestiona ta cual mandato AVP y Futuro ta papiando di dje, y awor ta bayendo contra mandato di pueblo. Mester remarca cu momento cu Mike de Meza a hiba palabra, Mike Eman a sali di sala di Parlamento.
