Rycond Santos Do Nascimento, Lider di partido LpR
ORANJESTAD (AAN) — Señor Rycond Santos Do Nascimento, Lider di Partido Lucha pa Reforma, a yama un conferencia di prensa, contento di a logra yena e cantidad di 586 firma, pa participa den e proximo eleccion parlamentario, cual meta no a keda den un soño, pero un soño cu ta birando realidad.
Santos Do Nascimento a relata cu tempo cu el a drenta den politica, su deseo tabata pa eleva e nivel di politica na Aruba, trece un perspectiva di largo plazo, kibra locual ta e tradicionnan robes di politico cu tin na Aruba, y nos tin hopi trabao pa haci.
“Anto den e cuadro aki nos a haya siete candidato pa Lucha pa Reforma (LpR), cu ta kere den norma y balor tradicional. No tin ningun hende akinan, cu no ta kere den norma y balor tradicional, y esey ta algo cu nos a vocifera repetidamente”, Rycond Santos Do Nascimento a señala.
El a subraya cu esaki ta nifica, entre otro, cu LpR ta kere den respet pa otro, dignidad di cada ser humano, y tambe e ta pone cu nan tin postura den e lucha pa integridad, nan ta para contra corrupcion.
“Cosnan cu a bin forma un plaga den e politica di Aruba, y nos a wak tambe hopi problema den e aparato gubernamental. Nos conviccion ta cu si nos kier tin un pais prospero, e prome cos cu nos tin cu haci ta percura pa nos cas ta na ordo, y pesey nos a cuminza cu principionan, nos a cuminza cu norma y balornan, nos politica ta diferente, anto den e cuadro ey laga mi presenta na pueblo di Aruba nos candidatonan”, Rycond Santos Do Nascimento, lider di LpR a indica. Den otro articulo, DIARIO ta elabora tocante e parti aki.
